الماتىدا جىلىنا 1 ميلليون شەتەلدىك تۋريست قابىلداۋعا جوسپار قۇرىلدى

الماتى. قازاقپارات - الماتىدا تۋريزم سالاسىن كەشەندى دامىتۋ جوسپارلانىپ وتىر. بۇل تۋرالى قالا اكىمى ەربولات دوسايەۆ ايتتى، دەپ حابارلايدى قازاقپارات ءتىلشىسى.

«الماتىنىڭ جانە الماتى وبلىسىنىڭ تۋريستىك الەۋەتىن تولىق پايدالانۋىمىز كەرەك. تۋريستىك ينفراقۇرىلىمدى كەشەندى تۇردە دامىتامىز. جولاۋشىلار اعىنىن جىلىنا 14 ميلليونعا دەيىن، ياعني ەكى ەسەگە ارتتىراتىن جاڭا اۋەجاي تەرمينالىنىڭ قۇرىلىسى بار. شاڭعى دەمالىسى مەن ەكوتۋريزم ورتالىعىن قۇرىپ، قوناق ءۇي سانىن ارتىرامىز»، - دەدى اكىم الماتى قالاسىن دامىتۋدىڭ 2025 -جىلعا دەيىنگى جوسپارىن تالقىلاۋ بارىسىندا.

مەگاپوليس باسشىسى الماتىدا تۋريستەرگە قىزمەت كورسەتۋ ساپاسىن ارتتىرۋ ماقساتىندا قالانىڭ Discover Almaty جاڭا برەندى ازىرلەنەتىنىن اتاپ ءوتتى.

«2030 -جىلعا قاراي الماتىعا كەلەتىن شەتەلدىك تۋريستەردىڭ سانىن 1 ميلليونعا دەيىن ارتتىرۋ جوسپاردا»، - دەدى ەربولات دوسايەۆ.

قالا اكىمىنىڭ ايتۋىنشا، تۇرعىنداردان تۋريزمدى باسقارۋ جۇيەسىن ستاندارتتاۋ، سيفرلىق كارتالار، ءۇش تىلدە ءمازىر مەن تۋريستىك ايماقتارعا تەگىن Wi-Fi ەنگىزۋ بويىنشا ۇسىنىستار تۇسكەن.

«بۇل ۇسىنىستارمەن كەلىسەمىز جانە ودان ءارى دامۋ جوسپارىن ازىرلەۋ كەزىندە ەسكەرەتىن بولامىز»، - دەدى اكىم.

سونىمەن قاتار، ول كەيىنگى 5 جىلدا قالاعا كەلگەن شەتەلدىك تۋريستەر سانى 1,4 ەسەگە ارتىپ، 301 مىڭنان 435,6 مىڭ ادامعا جەتكەنىن ايتتى.