قازاقستاندا 1-شىلدەدەن باستاپ نە وزگەرەدى
1 شىلدە 09:10

قازاقستاندا 1-شىلدەدەن باستاپ نە وزگەرەدى

نۇر-سۇلتان. قازاقپارات - قازاقپارات 1-شىلدەدەن باستاپ قازاقستاندىقتاردى قانداي وزگەرىستەر كۇتىپ تۇرعانىنا شولۋ ۇسىنادى.

سۇيىتىلعان گاز باعاسى - 180 كۇن تۇگەسىلدى

قاڭتار ايىنىڭ باسىندا تۋىنداعان تولقۋدان كەيىن سۇيىتىلعان گازدىڭ باعاسى مەملەكەتتىڭ رەتتەۋىنە بەرىلگەن بولاتىن. سول 180 كۇن مەرزىم تۇگەسىلەتىن ءسات كەلىپ تۇر. باسەكەلەستىكتى قورعاۋ جانە دامىتۋ اگەنتتىگى قازىرگى باعانى جىل سوڭىنا دەيىن ساقتاپ قالۋدى ۇسىنىپ وتىر.

«اشىق ن ق ا» پورتالىندا كوپشىلىكتىڭ تالقىلاۋىنا شىعارىلعان قاۋلى جوباسىندا وسىنداي باستاما كوتەرىلگەن. «بۇعان دەيىن شەكتەۋ قويعان بۇيرىقتىڭ مەرزىمى 2022 -جىلى-شىلدەدە اياقتالادى. سۇيىتىلعان مۇناي گاز نارىعىنىڭ بولشەك سەگمەنتىندە ەركىن باعا بەلگىلەۋ ەنگىزىلسە، باعانىڭ كۇرت ءوسۋى مەن قوعامدا الەۋمەتتىك شيەلەنىستىڭ پايدا بولۋ قاۋپى بار. وسىعان بايلانىستى، باسەكەلەستىكتى قورعاۋ جانە دامىتۋ اگەنتتىگى جىل سوڭىنا دەيىن سۇيىتىلعان مۇناي گاز باعاسىن قازىرگى مولشەردە قالدىرۋدى ۇسىندى»، - دەپ جازىلعان قۇجات جوباسىندا.

وسىلايشا سۇيىتىلعان گاز باعاسىنىڭ ىشكى نارىقتاعى باعاسى قازىرگى قالپىندا قالماق. ناقتىراق ايتساق: - نۇر-سۇلتان، الماتى قالالارى مەن اقمولا، قوستاناي، قاراعاندى، پاۆلودار، سولتۇستىك قازاقستان، جەتىسۋ، ۇلىتاۋ جانە الماتى وبلىستارىندا قازىر كولىك گازىنىڭ باعاسى ليترىنە - 70-75 تەڭگە كولەمىندە؛

- شىمكەنت قالاسى مەن شىعىس قازاقستان، جامبىل، باتىس قازاقستان، قىزىلوردا، تۇركىستان جانە اباي وبلىستارىندا - 60-65 تەڭگە مولشەرىندە؛

- اقتوبە، اتىراۋ جانە ماڭعىستاۋ وبلىستارىندا ءبىر ليترى - 50-55 تەڭگە بولىپ بەكتىلىگەن.

پاتەر يەلەرى كووپەراتيۆتەرى تاعى ءبىر جىل جۇمىس ىستەيدى

2022 -جىلدىڭ 1-شىلدەسىنەن باستاپ پاتەر يەلەرى كووپەراتيۆتەرىنىڭ ورنىنا مۇلىك يەلەرى بىرلەسىتىگى مەن جاي سەرىكتەستىكتەر قۇرىلىپ ءبىتۋى كەرەك بولعان. بۇل رەفورما تاعى كەيىنگە شەگەرىلدى. تاعى دەپ وتىرعانىمىز، اۋەل باستا پاتەر يەلەرى مەن تۇرعىن ەمەس عيماراتتاردىڭ مەنشىك يەلەرى 2021 -جىلدىڭ 7-قاڭتارىنا دەيىن مۇلىك يەلەرىنىڭ بىرلەستىگىنە نەمەسە جاي سەرىكتەستىكتەرگە بىرىگۋى كەرەك بولعان. ءبىراق پاندەميا يندۋستريا جانە ينفراقۇرىلىمدىق دامۋ مينيسترلىگىنىڭ جوسپارىن وزگەرتىپ، بۇل شارا 2022 -جىلدىڭ 1-شىلدەسىنە شەگەرىلگەن. جۋىقتا ق ر پارلامەنتى ءماجىلىسى ەنەرگيا ۇنەمدەۋ تۋرالى زاڭ جوباسىنا سەنات ەنگىزگەن وزگەرىستەردى قابىلداعان ەدى. اتالعان قۇجات بويىنشا، پاتەر يەلەرى كووپەراتيۆتەرى تاعى ءبىر جىل جۇمىس ىستەيتىن بولدى.

ءبىر توپ ماماننىڭ ايلىعى 75 پايىز وسەدى

1-شىلدەدەن باستاپ «ۇلتتىق» مارتەبەسى بار مادەنيەت مەكەمەلەرى قىزمەتكەرلەرىنىڭ ەڭبەكاقىسى 75 پايىز وسەدى. كەشە مادەنيەت جانە سپورت ءمينيسترى داۋرەن ابايەۆ شىمكەنتتەگى كەزدەسۋدە وسىنداي مالىمەت بەردى. «مادەنيەت جانە ارحيۆ ءىسى ۇيىمدارى قىزمەتكەرلەرىنىڭ ەڭبەكاقىسى ورتا ەسەپپەن ءار جىل سايىن 20 پايىزعا وسەتىن بولادى. بۇل جۇمىس 2025 -جىلعا دەيىن جۇرگىزىلەدى، ياعني وسى كەزەڭدە ەڭبەكاقى كولەمى 100 پايىزعا ارتادى. مەملەكەت باسشىسىنىڭ جارلىعىنا سايكەس 1-شىلدەدەن باستاپ «ۇلتتىق» مارتەبەسى بار مادەنيەت مەكەمەلەرى قىزمەتكەرلەرىنىڭ ەڭبەكاقىسى 75 پايىزعا ارتاتىنىن اتاپ وتكىم كەلەدى»، - دەدى داۋرەن ابايەۆ.

دارىلەر تاڭبالانادى

ۇكىمەتتىڭ 2022 -جىلعى 25-ساۋىردەگى قاۋلىسىمەن تاڭبالاۋعا جاتاتىن تاۋارلاردىڭ تىزبەسى تولىقتىرىلدى.

اتالعان قۇجاتتىڭ 8-مامىردا كۇشىنە ەنگەنىن ەسكەرسەك، 2022 -جىلدىڭ 1-شىلدەسىنەن باستاپ شىعارىلاتىن دارىلەرگە تاڭبالاۋ ەنگىزىلەدى. قاۋلى تىزىمىندە مىنانداي دارىلەر بار:

- يممۋندىق سارىسۋلار جانە قاننىڭ باسقا فراكسيالارىنا كەرەك دارىلەر؛

- دارىلىك پىشىندەرگە نەمەسە بولشەك ساۋداعا ارنالعان پىشىندەرگە نەمەسە قاپتامالارعا سالىنعان يممۋنولوگيالىق پرەپاراتتار؛

- ەمدىك، پروفيلاكتيكا نەمەسە دياگنوستيكا ءۇشىن دايىندالعان جانۋارلاردىڭ قانى؛

- باسقا دا بارلىق دارىلەر.

مەملەكەتتىك ساتىپ الۋعا قاتىسۋ ءۇشىن تاۋاردى ەلەكتروندى كاتالوگقا تىركەۋ قاجەت بولادى

2022 -جىلعى 1-شىلدەدەن باستاپ قارجى ءمينيسترىنىڭ 2022 -جىلعى 19-قاڭتارداعى №52-بۇيرىعى كۇشىنە ەنەدى. ول قۇجات بويىنشا مەملەكەتتىك ساتىپ الۋ پروتسەدۋراسىنا قاتىسۋ ءۇشىن تاۋاردى ەلەكتروندى كاتالوگقا تىركەۋ قاجەت بولادى.

ەلەكتروندىق كاتالوگتان ساتىپ الىناتىن تاۋارلار تىزبەسىنە تاۋارلاردىڭ ساناتى مىناداي:

- كەڭسە تاۋارلارى:

- شارۋاشىلىق تاۋارلارى؛

- دارىلىك زاتتار جانە مەديتسينالىق ماقساتتاعى بۇيىمدار؛

- ەلەكتر تاۋارلارى.

2022-2023 -جىلعى اڭشىلىق ماۋسىمدا اتۋعا جاتاتىن حايۋانداردىڭ جاڭا ءليميتى كۇشىنە ەنەدى

ەكولوگيا، گەولوگيا جانە تابيعي رەسۋرستار ءمينيسترىنىڭ 2022 -جىلعى 10-ماۋسىمداعى بۇيرىعى بويىنشا، 2022 -جىلدىڭ 1-شىلدەسى مەن 2023 -جىلدىڭ 15-اقپانىنان دەيىنگى ارالىقتا اتۋعا بولاتىن جانۋارلاردىڭ ليميتى بەلگىلەنگەن.

قۇجاتقا سۇيەنسەك، اتالعان مەرزىمدە قازاقستان اۋماعىندا 15124 قابان، 1110 مارال، 11185 ءسىبىر ەلىگىن، 515 بۇلان، 1347 تاۋەشكى، 150 قوڭىر ايۋ، 126 سىلەۋسىن، 509 جانات ءتارىزدى يت، ,13904 قارساق، 57764 تۇلكى، 15132 بورسىق، 10297 اقكىس، 109148 ونداتر، 391322 قويان، 304430 سۋىر، 254000 قاز،

886000 ۇيرەك، 52758 كۋليك، 87489 قىرعاۋىل، 111338 قۇر، 132904 كوگەرشىن جانە ت. ب. اتۋعا رۇقسات بەرىلمەك.

بۇل ليميتتىڭ وبلىستار بويىنشا ءبولىنىسىن مىنا جەردەن كورۋگە بولادى.

كاسىپكەرلىك كودەكسكە ەنگىزىلگەن وزگەرىستەر كۇشىنە ەنەدى

ناقتىراق ايتساق، مەملەكەتتىك مونوپوليا تەتىگىن تولىقتىراتىن جانە جەتىلدىرەتىن «ارنايى قۇقىقتىق» ينستيتۋتىن قۇرۋ كوزدەلگەن.

جەر قويناۋىن پايدالانۋشىلار تاۋار، قىزمەت، جۇمىس تۇرلەرىن ساتىپ الۋ جوسپارىن ۇسىنۋعا مىندەتتەلەدى

جەر قويناۋىن پايدالانۋشىلار قاتتى پايدالى قازبالار سالاسىنداعى ۋاكىلەتتى ورگانعا تاۋارلاردى، جۇمىستار مەن كورسەتىلەتىن قىزمەتتەردى ساتىپ الۋدىڭ جىلدىق جانە بەس جىلدىق باعدارلامالارىن، سونداي-اق جوسپارلانىپ وتىرعان ساتىپ الۋ تۋرالى اقپارات بەرۋگە مىندەتتى بولادى.

تەرگەۋ يزولياتورىنداعى مەديتسينالىق ۇيىمداردا كۇدىكتىلەر مەن ايىپتالۋشىلار اۋرۋ تۇرلەرى بويىنشا ىرىكتەپ جاتقىزىلادى

بۇدان بولەك ەرلەر مەن ايەلدەر، كامەلەتكە تولماعاندار مەن ەرەسەكتەر بولەك ۇستالادى. اسا اۋىر جانە اۋىر قىلمىستار جاسادى دەپ كۇدىكتىلەر مەن ايىپتالۋشىلار وقشاۋ ۇستالادى.


جاڭالىقتار