شىمكەنتتە 1-سىنىپ وقۋشىسىن ساباق ۇستىندە ۇرعان ايەل ۆيدەوعا ءتۇسىپ قالدى

نۇر-سۇلتان. قازاقپارات - شىمكەنتتە ەگدە جاستاعى ايەل مەكتەپتە ءبىرىنشى سىنىپ وقۋشىسىنىڭ بەتىنەن ۇرعان.

ول ەندى بالانى ۇرىپ- سوققانى ءۇشىن سوتتا جاۋاپ بەرەدى، - دەپ حابارلايدى Otyrar.kz باسىلىمى.

وقيعا بيىل تامىزدا بولعان، بۇل كەزدە وقۋشىلار دايىندىق ساباقتارىن ءوتىپ جاتقان. ءبىرىنشى سىنىپ وقۋشىلارى جانجالداسىپ قالعان، ولاردىڭ ءبىرى اجەسىنە شاعىمدانعان. اجەسى كابينەتكە كىرىپ، بالاعا ايعايلاپ، كەيىن بەتىنەن ۇرعان. وقيعا بەينەباقىلاۋ كامەراسىنا ءتۇسىپ قالعان. مەكتەپ ديرەكتورىنىڭ ايتۋىنشا، وقىتۋشى اجەيدى توقتاتىپ ۇلگەرمەپتى.

«بالانىڭ بەتىندە ءىز قالدى. ايەلدىڭ قولىندا ساقيناسى بولعاننان دەپ ويلايمىن»، - دەيدى «جاس دارىن-2» مەكتەبىنىڭ ديرەكتورى پەرنەباي بەدەلوۆ.

بالانىڭ اتا-اناسى پوليتسياعا ارىز جازعان، ال كەيىن بالا باسقا مەكتەپكە اۋىسىپ كەتىپتى.

وقيعادان كەيىن ەكى اي ۋاقىت ءوتىپ، ايەل ءالى كۇنگە جازالانباعان. پوليتسيا دەپارتامەنتى وكىلدەرى ەكى ايلىق تەرگەۋدەن كەيىن ءىس سوتقا جەتكەنىن حابارلاپ وتىر. ايەلدىڭ ءىسى «ۇرىپ- سوعۋ» بابى بويىنشا تەرگەلىپ جاتىر. وعان 30 مىڭ تەڭگە شاماسىندا ايىپپۇل سالىنۋى نەمەسە 10 تاۋلىككە قامالۋى مۇمكىن.

جۋرناليستەردىڭ پىكىرىنشە، سوت جاسىن ەسكەرىپ، زەينەتكەرگە ايىپپۇل سالۋى مۇمكىن.