التاي كولگىنوۆ: كوكتال-1 ەلدى مەكەنىن تۇتاستاي گازبەن قامتاماسىز ەتتىك - فوتو

نۇر-سۇلتان. قازاقپارات - Nur Otan پارتياسىنىڭ سايلاۋالدى باعدارلاماسىنا سايكەس تاعى 130 ك م سۋمەن جابدىقتاۋ جانە سۋ بۇرۋ جەلىلەرى، 85 ك م نوسەر كارىزى، قوسالقى ستانسا مەن 177 ك م ەلەكترمەن جابدىقتاۋ جەلىلەرى، 23 ك م جىلۋمەن جابدىقتاۋ جەلىلەرى، 3 كەشەن نوسەر كارىزدەرىن تازارتۋ قۇرىلىستارى سالىنادى.

بۇل تۋرالى نۇر-سۇلتان قالاسىنىڭ اكىمى التاي كولگىنوۆ Instagram پاراقشاسىندا ءمالىم ەتتى، دەپ حابارلايدى ەلوردا اكىمدىگىنىڭ رەسمي سايتى.

«قالاداعى ەلدى مەكەندەردى ارالاۋدى جالعاستىرامىز. وزدەرىڭىز بىلەتىندەي، بىزدە ولاردىڭ سانى - 16.

وندا تۇراتىن حالىقتىڭ سانى - 300 مىڭعا جۋىق ادام. بۇل - ەلوردانىڭ ءاربىر ءتورتىنشى تۇرعىنى ەلدى مەكەندە تۇرادى دەگەن ءسوز. كوكتال-1 ەلدى مەكەنى تۇرعىندارىمەن كەزدەستىم. اتالعان ەلدى مەكەندە قوردالانىپ قالعان ءبىرقاتار ماسەلەنى شەشۋ جۇمىستارىمەن اينالىسىپ جاتىرمىز: جول سالۋ، قوعامدىق كەڭىستىكتەردى اباتتاندىرۋ، سۋ تارتۋ، كارىز سالۋ، جارىقتاندىرۋ جانە ت. ب. جۇمىستار. كوكتال-1 ەلدى مەكەنى تۇرعىندارىمەن كەزدەسۋدە ەڭ ءبىرىنشى كەزەكتە اتقارىلۋى قاجەت جۇمىستار تۋرالى اڭگىمەلەسىپ، پىكىر الماستىق. ماسەلەن، قالالىقتار جول، تروتۋار، سكۆەرلەر/بۋلۆارلار، بالالار مەن سپورت الاڭدارىن سالۋ جانە جارىقتاندىرۋ، ت. ب. ماسەلەلەر تۋرالى ءوز ويلارىمەن ءبولىستى.

ايتىلعان ماسەلەلەردى نازارعا الىپ، وسى ەلدى مەكەننىڭ الداعى دامۋ جوسپارىنا ەنگىزەمىز.

مىسالى، كوكتال-1 ەلدى مەكەنىن تۇتاستاي گازبەن قامتاماسىز ەتتىك. سونىمەن قاتار بيىل №40 مەكتەپ- ليتسەي اۋماعىندا ەكى اۋىسىمدا 1 مىڭ ورىندى قامتيتىن تاعى ءبىر وقۋ ورنى سالىندى. وسىلايشا مەكتەپكە تۇسەتىن جۇكتەمە ازايىپ، جاڭا وقۋشى ورىندارى اشىلادى. سوعان قوسا، وسى ەلدى مەكەندە قالالىقتاردىڭ تازا اۋادا سالاۋاتتى ءومىر سالتىن ساقتاي وتىرىپ، جايلى جاعدايدا ۋاقىتىن پايدالى وتكىزۋىنە مۇمكىندىك بەرەتىن تاعى 2 قوعامدىق كەڭىستىك سالامىز (اقتولقىن كوشەسى، باستاڭعى قيىلىسى). وتكەن جىلى ەلدى مەكەندە ءبىرىنشى رەت پارك سالىندى. ونىڭ اۋقىمى - 15 گ ا.

سالىستىرمالى تۇردە ايتار بولساق، بۇل پارك ءبىزدىڭ قالالىق پاركتەن 2 ەسە ۇلكەن. كوكتالداعى جاڭا پاركتە باسكەتبول، فۋتبول الاڭدارى مەن ۆوركاۋت- ايماقتار، تىنىش دەمالۋعا جانە يتتەردى سەرۋەندەتۋگە ارنالعان ايماقتار بار. مەملەكەت باسشىسى ەلدى مەكەندەردى دامىتۋعا ەرەكشە كوڭىل اۋدارادى. سوندىقتان بارلىق ەلدى مەكەندەردى دامىتۋ باعىتىندا جۇمىس جۇرگىزۋدەمىز. مىسالى، بىلتىر شەت ايماقتاردا 100 كوشە، 345 ك م گاز تاراتۋ جەلىلەرىن سالدىق.

ءۇش ەلدى مەكەن تۇرعىندارى گازعا قوسىلۋعا مۇمكىندىك الدى. جاڭا جىلىتۋ ماۋسىمىندا تاعى 7 ەلدى مەكەن گازعا كوشىرىلەدى. بۇعان قوسا، 13,5 ك م ينجەنەرلىك جەلى، 5 ك م- دەن استام كارىز جەلىسى جانە سۋ قۇبىرىن تارتتىق، 3 ك م- دەن استام نوسەر كارىزدەرى سالىندى.

وتكەن جىلى 40 قوعامدىق كەڭىستىكتى بوس جاتقان تىڭ جەردەن جاڭادان سالدىق: ولار - پاركتەر، سكۆەرلەر، بۋلۆارلار. (كوكتال-1، كوكتال-2، اگروگورودوك، ينتەرناتسيونالنىي، ءوندىرىس جانە ت. ب. ). جوسپاردا تاعى 50 پارك پەن سكۆەر سالۋ، 120 ك م- دەن استام ۆەلوسيپەد جولىن توسەۋ جانە ت. ب. جۇمىستاردى اتقارۋ كوزدەلىپ وتىر.

ءوندىرىس، كوكتال، يلينكا، جەلەزنودوروجنىي ەلدى مەكەندەرىندە دەنە شىنىقتىرۋ جانە ساۋىقتىرۋ كەشەندەرىنىڭ قۇرىلىسىن جۇرگىزۋدەمىز. ول ورىنداردا سپورتپەن اينالىسۋعا ارنالعان كابينەتتەردەن بولەك، ەگدە جاستاعى ادامداردىڭ قىزىعۋشىلىعى بويىنشا كلۋبتار، ح ق و، پوليتسيا، پوشتا بولىمشەلەرى جانە ت. ب. ورنالاستىرىلاتىن بولادى.

اتالعان كەشەندەرگە تۇرعىندار تەگىن بارادى. ولاردى بيىل اشۋدى جوسپارلاپ وتىرمىز. الداعى جىلدارى Nur Otan پارتياسىنىڭ سايلاۋالدى باعدارلاماسىنا سايكەس تاعى 130 ك م سۋمەن جابدىقتاۋ جانە سۋ بۇرۋ جەلىلەرىن، 85 ك م نوسەر كارىزىن، قوسالقى ستانسا مەن 177 ك م ەلەكترمەن جابدىقتاۋ جەلىلەرىن، 23 ك م جىلۋمەن جابدىقتاۋ جەلىلەرىن، 3 كەشەن نوسەر كارىزدەرىن تازارتۋ قۇرىلىستارىن سالامىز. وسىلايشا، بۇعان دەيىن ايتقانىمداي، ءبىزدىڭ ماقساتىمىز - شەت ايماقتاردى شاعىن اۋداندارعا اينالدىرۋ. بۇل شاعىن اۋدانداردىڭ تازا اۋادا دەمالۋعا ارنالعان ورىندارى، الەۋمەتتىك نىساندارى، جايلى ءومىر ءسۇرۋ ءۇشىن قولايلى ينفراقۇرىلىمى جانە ت. ب. بولادى» ، - دەپ جازدى ەلوردا اكىمى.