موڭعوليا 1-مامىردان باستاپ اۋە شەكارالارىن اشادى
الايدا قازىرگى كەزدە تەك ۆاكسينا تولىق كولەمدە ەگىلگەن ازاماتتارعا عانا كىرۋگە رۇقسات ەتۋ جوسپارلانىپ وتىر.
بۇل تۋرالى قازاقپارات موڭعوليانىڭ مونسامە اگەنتتىگىنە سىلتەمە جاساپ حابارلايدى.
موڭعوليا ۇكىمەتىنىڭ كەزەكتەن تىس وتىرىسىندا قابىلدانعان شەشىمدەر جاريالانعان باسپا ءسوز ءماسليحاتى كەزىندە ەلدىڭ پرەمەر-ءمينيسترى ل. ويۋۋن-ەردەنە وسىلاي ءمالىم ەتتى.
ۇكىمەت باسشىسىنىڭ اتاپ وتۋىنشە، ءتيىمدى ەكونوميكالىق اسەردەن باسقا، بۇل اۋە شەكارالارى اشىلعان سوڭ ەكى ايدىڭ ىشىندە حۋشيگ اڭعارىندا جاڭا حالىقارالىق اۋەجايىن اشۋعا مۇمكىندىك بەرەدى.
«1-شىلدەگە قاراي ماقساتتى توپتى تولىق ۆاكسينالاۋ تۋريستەردى ەلگە كەلۋگە ىنتالاندىرىپ، الەمگە پوزيتيۆتى سيگنال جولدايدى. بۇل ماقساتپەن ءبىز اۋەجايدى ناادام ۇلتتىق مەرەكەسىنىڭ الدىندا اشۋ ءۇشىن ارنايى جۇمىستار جۇرگىزۋدەمىز»، - دەدى ل. ويۋۋن-ەردەنە.
ەسكە سالا كەتسەك، موڭعوليا ۇكىمەتى كەزەكتەن تىس وتىرىسىندا جوعارى دايارلىقتىڭ قازىرگى رەجيمىن قىزعىلت سارى دەڭگەيدەن قىزىل دەڭگەيگە اۋىستىرۋ جانە 10-25-ءساۋىر كۇندەرى ارالىعىندا قاتاڭ كارانتين رەجيمىن ەنگىزۋ شەشىمىن قابىلدادى.
اۆتور: زارينا تۋعانبايەۆا