ەلىمىزدە 1 تەكشە مەتر اۋىز سۋ ءۇشىن حالىقتىڭ تولەمىن رەتتەيتىن زاڭ جوباسى ازىرلەندى
بۇل تۋرالى يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«اۋىلداردىڭ سۋمەن جابدىقتالۋىنا مونيتورينگ جۇرگىزۋ ماقساتىندا ينتەراكتيۆتى كارتا ازىرلەپ، ىسكە قوستىق. وندا كوپتەگەن پارامەترلەر بويىنشا ناقتى جاعداي كورسەتىلگەن. ورتالىق جانە جەرگىلىكتى اتقارۋشى ورگاندار اراسىنداعى قۇزىرەتتى ءبولۋ بويىنشا زاڭ جوباسى ازىرلەندى»، - دەدى مينيستر.
ونىڭ اتاپ وتۋىنشە، تىزبەنى بەكىتۋ فۋنكتسياسىن، سونداي-اق اۋىز سۋعا تولەم مولشەرىن ازىرلەۋ نورمالارىن بەكىتۋدى جەرگىلىكتى اتقارۋشى ورگاندارعا بەرۋ جوسپارلانعان.
«زاڭ جوباسىندا كورسەتىلگەن شارالاردى ىسكە اسىرۋ مىناداي مۇمكىندىكتەر بەرەدى: سالىنعان وقشاۋ جۇيەلەردى تىزبەگە ەنگىزۋدى جەدەلدەتەدى؛ وڭىرلەرگە اۋىز سۋمەن جابدىقتاۋعا ارنالعان سۋبسيديانى ءبولۋ مەن الۋدى تەزدەتەدى؛ وبلىس بويىنشا ورتاشا تاريف پەن ءوڭىردىڭ الەۋمەتتىك- ەكونوميكالىق دامۋىن ەسكەرە وتىرىپ، 1 تەكشە مەتر اۋىز سۋ ءۇشىن حالىقتىڭ تولەمىن رەتتەيدى»، - دەدى بەيبىت اتامقۇلوۆ.