الماتىدا وقۋشىلارعا تاراتىلعان 1 مىڭنان استام پلانشەت جارامسىز بولىپ شىقتى

الماتى. قازاقپارات - الماتىدا كوپبالالى اتا- انالار قاشىقتان وقۋعا تەگىن تاراتىلعان پلانشەتتەرگە قاتىستى شاعىم ءتۇسىردى، دەپ حابارلايدى قازاقپارات ءتىلشىسى.

الماتى اكىمدىگىندە قۇرىلعان ارنايى كوميستسيا ساراپتامانىڭ ءبىرىنشى كەزەڭىن قورىتىندىلادى.

«وتكەن اپتادا كوپبالالى انالاردىڭ كوپ شاعىم كەلدى. سوعان بايلانىستى ءبىز اتا- انالاردىڭ قولىنداعى پلانشەتتەردىڭ تەحنيكالىق تالاپقا ساي ەكەندىگىن انىقتاۋ ءۇشىن ارنايى تاۋەلسىز ساراپتاما تاعايىندادىق»، - دەدى قوعامدىق باقىلاۋ ۇيلەستىرۋشىسى سايدا تاۋكەليەۆا.

قالادا جالپى قۇنى 1 ميلليارد 319 مىڭ تەڭگە بولاتىن 22 مىڭ پلانشەت تاراتىلعان. 1 پلانشەت قۇنى 60 مىڭ تەڭگە شاماسىندا.

«1119 پلانشەت جارامسىز بوپ شىقتى. بۇل بۇيىمداردى جەتكىزۋشىگە قايتاردىق»، - دەدى قالالىق ءبىلىم باسقارماسى باسشىسىنىڭ ورىنباسارى ايدىن سايلاۋباي. ساراپشىلاردىڭ پىكىرىنشە، تەحنيكالىق اقاۋلار مەحانيكالىق اسەردەن بولۋى مۇمكىن.

«زاۋىتتان بولعان اقاۋ بولسا جەتكىزۋشى اۋىستىرىپ بەرەدى. بۇل تەحنيكا بولعاندىقتان بۇزىلۋى مۇمكىن. پلانشەت ويناۋعا ەمەس، ساباق وقۋعا بەرىلەتىنىن ەسكەرۋ كەرەك»، - دەدى مونيتورينگ توبىنىڭ وكىلى رافاەل گاسانوۆ.

ونىڭ ايتۋىنشا، پلانشەتتەرگە 3 جىل كەپىلدىك بەرىلەدى. الماتى وقۋشىلارىنىڭ 96 پايىزى قاشىقتان ءبىلىم الۋى ءۇشىن قاجەتتى قۇرالمەن قامتىلعان. ەگەر پلانشەت مەحانيكالىق اسەردەن ىستەن شىقسا، ونى اۋىستىرۋ زاڭ ويىنشا قاراستىرىلماق.

اۆتور: گۇلميرا عوسمانالي