ەلوردادا 1 ميلليون تەڭگەلىك سەرتيفيكات كىمدەرگە بەرىلەدى؟
«قازىرگى تاڭدا «5-10-20» تۇرعىن ءۇي باعدارلاماسىنان ءۇمىتتى بەس سانات بويىنشا 47500 ادام كەزەكتە تۇر. ول ساناتتار: الەۋمەتتىك جاعىنان وسال توپتار (ونىڭ ىشىنە تولىق ەمەس وتباسىلار، ءبىرىنشى جانە ەكىنشى توپتاعى مۇگەدەكتەر، مۇگەدەك بالاسى بار وتباسىلار، جاسى بويىنشا زەينەتكەرلەر كىرەدى)، جەتىم بالالار، كوپبالالى وتباسىلار، مەملەكەتتىك قىزمەتشىلەر مەن ارەندالىق ۇيدە تۇراتىن ازاماتتار. ياعني، وسى بەس ساناتتىڭ بارلىعى «5-10-20» باعدارلاماسىنا قاتىسا الادى»، - دەدى ارماناي قابدەشوۆا نۇر-سۇلتان اكىمدىگىنىڭ Instagram-پاراقشاسىندا سۇراقتارعا جاۋاپ بەرە وتىرىپ.
ونىڭ ايتۋىنشا، الەۋمەتتىك تۇرعىدا از قامتىلعان جانە كوپبالالى وتباسىلارعا، جەتىم بالالارعا وسى باعدارلاما اياسىندا باستاپقى جارنا رەتىندە 1 ميلليون تەڭگەلىك سەرتيفيكات ۇسىنىلادى. ياعني بۇل - اكىمدىك تاراپىنان بەرىلەتىن قايتارىمسىز كومەك.
«بۇل سەرتيفيكاتتى الۋ ءۇشىن ءبىرىنشى پروتسەدۋرادان - بانكتەن ءوتۋ كەرەك. تولەماقى جايلى بارلىق اقپاراتتى تاپسىرۋ قاجەت. وسىدان كەيىن ازامات تۇرعىن ءۇي قورىنا كەلىپ، سەرتيفيكاتتى الۋعا ءوتىنىش جازادى. تەك وسى ساناتتاعى ازاماتتار باعدارلاما اياسىندا سەرتيفيكاتقا ءوتىنىش بەرە الادى»، - دەدى ول.
ەسكە سالا كەتسەك، وسىدان بىرنەشە كۇن بۇرىن «5-10-20» تۇرعىن ءۇي باعدارلاماسى بويىنشا نەسيە بەرىلە باستاعانى حابارلانعان بولاتىن.
«نۇرلى جەر» مەملەكەتتىك باعدارلاماسىنىڭ جاڭا باعىتتارىنىڭ ءبىرى - «شاڭىراق» پيلوتتىق جوباسىن تۇرعىن ءۇي قۇرىلىس جيناق بانكى («بايتەرەك» حولدينگىنىڭ ەنشىلەس ۇيىمى) جۇزەگە اسىرادى.
«شاڭىراق» جوباسىنىڭ اياسىندا جەڭىلدەتىلگەن نەسيەنى ءبىرىنشى كەزەڭدە، باسپاناعا مۇقتاج جان رەتىندە 1986-جىلدان باستاپ 2015-جىلعا دەيىنگى مەرزىمدى قوسا العاندا اكىمدىك كەزەگىندە تۇرعان ازاماتتار الا الادى.