الماتىلىق بويجەتكەننىڭ اسقازانىنان 1 كەلى شاش شىقتى
17 جاستاعى بويجەتكەن اسقازانىنىڭ ەپيگاستري ايماعى اۋىرىپ تۇسكەن. وعان فيبروگاسترودۋودەنوسكوپيا (ف گ د س)، كومپيۋتەرلىك توموگرافيا جاسالعان. ناتيجەسىندە ونىڭ اسقازانىندا شاشتىڭ جۇمارلانعان تۇينەگى (تريحوبەزوار) بار ەكەنى انىقتالدى. بەزوار كوبىنەسە كۇيسەيتىن جانۋارلاردا ءجيى كەزدەسەدى. ادامدار اراسىندا ونداي جاعداي وتە سيرەك بولادى. پاتسيەنت اسقازانىندا شاش بارىنان بەيحابار بولعان.
«بۇگىن جوسپارلى وتا جاسالدى. لاپاروتوميا، گاستروتوميا، وتاسى كەزىندە اسقازان ءپىشىنىن قايتالاپ تۇرعان تريحوبەزوار انىقتالدى. بۇل تۇينەك اسقازاننىڭ 70 پايىز اۋدانىن الىپ تۇرعان. بويجەتكەننىڭ ءوزى شاش جەگەنىن مويىنداماي تۇر. الايدا بۇل بىرنەشە جىلدار بويى قالىپتاسقان تۇينەك. ونىڭ سالماعى 1 كەلىگە جەتىپ قالعان سوڭ اسقازاننىڭ ءپىشىنى سوزىلعان»، - دەدى اۋرۋحانا حيرۋرگى ابىلاي بايماحانوۆ.
تاجىريبەدە تريحوبەزوار وتە سيرەك كەزدەسەدى. ودان كەلەتىن قاۋىپ جوعارى. كونكرەمەنت اسقازان- ىشەك جولىمەن قوزعالۋ كەزىندە اسقازاننىڭ بىتەلۋىنە نەمەسە اسقازاننىڭ تەسىلۋىنە الىپ كەلۋى مۇمكىن بولدى. دارىگەرلەردىڭ ايتۋىنشا، بۇل جاعدايدا ناۋقاس مەديتسينالىق كومەككە ۋاقىتىندا جۇگىنگەن.
«تىرناق تىستەۋ نەمەسە شاش شايناپ جۇتۋ - بۇل پسيحولوگيالىق ادەت. بالالاردىڭ ادەتتەرىنە ەرتە جاستان نازار اۋدارۋ كەرەك. سونداي - اق، شاش اعزاعا تاماقپەن بىرگە كەتىپ، جىلدار بويى ماسساعا جينالۋى مۇمكىن»، - دەپ تولىقتىردى حيرۋرگ- دارىگەر، اسسيستەنت داۋرەن جۋماتايەۆ.
كوبىنەسە بۇل دەرت 30 جاسقا دەيىنگى قىز بالالاردا كەزدەسەدى. اۋرۋدىڭ باستالۋى ادەتتە سيمپتومسىز بولادى. بەزوار ءوسىپ كەلە جاتقاندا، ءىش اۋىرىپ، اۋىرلىق سەزىمى پايدا بولادى، جۇرەك اينۋ، قۇسۋ، تابەتتىڭ تومەندەۋى، تەمىر تاپشىلىعىنىڭ انەمياسى داميدى. بەزواردىڭ اسقىنۋى - ەروزيا جانە قان كەتەتىن اسقازان جارالارى، پەريتونيتتىڭ دامۋى، اش ىشەكتىڭ وبتۋراتسياسى بولىپ تابىلادى.
