الماتى پاركىندە 1 ميلليون تەڭگەگە «سويلەيتىن» ورىندىق قويىلدى

الماتى. قازاقپارات - الماتىدا تۇڭعىش پرەزيدەنت پاركىندە ينتەراكتيۆتى «سويلەيتىن» ورىندىق پايدا بولدى.

ورىندىقتار بەلگىلى قازاق اقىندارىنىڭ ولەڭدەرىن وقيدى، دەپ حابارلايدى قازاقپارات ءتىلشىسى.

وسىنداي ينتەراكتيۆتى ورىندىقتار بوستاندىق اۋدانىندا بىرنەشە جەردە قويىلاتىن بولدى.

«2019 -جىلى «قاتىسۋ بيۋدجەتى» جوباسىنا سايكەس بوستاندىق اۋدانىنىڭ تۇرعىندارى

2235 ميلليون تەڭگە سوماسىنا 47 ۇسىنىس ەنگىزگەن بولاتىن. ولاردىڭ ىشىندە قۇنى 963,7 ميلليون تەڭگەگە 34 جوبا داۋىس بەرۋگە جولداندى. بۇگىندە وسى جوبا اياسىندا ق ر تۇڭعىش پرەزيدەنتى پاركىندە 1 ينتەراكتيۆتى ورىندىق قويىلعان. قازىر تۇرعىنداردان ءوتىنىش كوپ ءتۇسىپ جاتىر. ءبىر ورىندىق قۇنى 1 ميلليون تەڭگە شاماسىندا»، - دەدى بۇگىن ونلاين بريفينگ بارىسىندا بوستاندىق اۋدانى اكىمىنىڭ ورىنباسارى سەرىك ادىلبايەۆ.

ورىندىقتىڭ ىشىندە اۋديوجۇيە ورناتىلادى. وعان بەلگىلى تاريحي تۇلعالاردىڭ بيوگرافياسى، اندەر مەن ولەڭدەر جازىلادى. ادام ورىندىققا وتىرعان كەزدە اۋديو قوسىلادى.

«ودان بولەك، «Open Almaty» پورتالىندا اشىق داۋىس بەرۋ ارقىلى 3 جوبا جەڭىمپاز اتاندى. قۇنى 9,5 ميلليون تەڭگە بولاتىن Workout ايماق پەن بالالار الاڭى قۇرىلىسى، جاروكوۆ 284/1 مەكەنجايىنداعى قۇنى 6,6 ميلليون تەڭگە بولاتىن بالالار ويىن الاڭى، قۇنى 1,7 ميلليون تەڭگە Togizkumalak Smart nation جوباسى. بوستاندىق اۋدانى اكىمدىگىنىڭ اپپاراتى 2020 -جىلى وسى جوبالارعا 14,3 ميلليون تەڭگە قاراستىردى. جوبالاردىڭ بارلىعى قازىر اياقتالىپ قالدى»، - دەدى سەرىك ادىلبايەۆ.

اۆتور: گۇلميرا عوسمانالي