بارلىق قازاقستاندىقتار1 - شىلدەگە دەيىن شارتتى تۇردە مەديتسينالىق ساقتاندىرىلعان بولىپ سانالادى

None
None
نۇر- سۇلتان. قازاقپارات - «الەۋمەتتىك مەديتسينالىق ساقتاندىرۋ قورى» كوممەرتسيالىق ەمەس اق باسقارما ءتوراعاسى ايباتىر جۇماعۇلوۆ 1 - شىلدەگە دەيىنگى شارتتى مەديتسينالىق ساقتاندىرۋ تالاپتارىن ءتۇسىندىردى، دەپ حابارلايدى قازاقپارات ءتىلشىسى.

«1 - ساۋىردەن باستاپ، مىندەتتى الەۋمەتتىك مەديتسينالىق ساقتاندىرۋ جۇيەسى تولىق ىسكە قوسىلۋى كەرەك ەدى. الايدا، كوروناۆيرۋس ىندەتىنە بايلانىستى توتەنشە جاعداي كەزىندە پرەزيدەنت قاسىم- جومارت توقايەۆ ارنايى تاپسىرما بەردى. وسى تاپسىرماعا سايكەس، 1- ءساۋىر مەن 1 - شىلدە ارالىعىندا بارلىق تۇرعىندار ءوزىنىڭ الەۋمەتتىك نەمەسە ساقتاندىرۋ مارتەبەسىنە قاراماستان، كەز كەلگەن تەگىن مەديتسينالىق كەپىلدەندىرىلگەن كومەك پەن م ءا م س جۇيەسىندەگى مەديتسينالىق كومەكتى الا الادى» ، - دەدى ا. جۇماعۇلوۆ ورتالىق كوممۋنيكاتسيالار قىزمەتىندە وتكەن بريفينگتە.

قور باسشىسىنىڭ ايتۋىنشا، 1 -ءساۋىر مەن 1 -شىلدە ارالىعىندا كەز كەلگەن قازاقستاندىق شارتتى تۇردە ساقتاندىرىلعان بولىپ سانالادى. ياعني، كەز كەلگەن قازاقستاندىق مىندەتتى الەۋمەتتىك ساقتاندىرۋ جۇيەسى مەن تەگىن مەديتسينالىق كەپىلدەندىرىلگەن كومەك تاراپىنان قىزمەت الۋعا قۇقىلى.

«بۇل - شامامەن 2,5 ميلليون استام ازاماتتى قولداۋ جۇيەسى. ەكونوميكالىق جاعدايعا بايلانىستى بۇل كورسەتكىش ءالى دە كوبەيۋى مۇمكىن. بۇل باعىتتا قور تاراپىنان 20 ميلليارد استام تەڭگە قاراستىرىلىپ وتىر. بۇل قاراجات قوردىڭ ىشكى رەزەرۆتەرىنەن الىنادى» ، - دەدى ا. جۇماعۇلوۆ.


سوڭعى جاڭالىقتار