ەلدىڭ زەينەتاقى جۇيەسىن جاڭعىرتۋ بويىنشا تاسىلدەر مەن شەشىمدەر 1- شىلدەگە دەيىن ازىرلەنەدى
بۇل تۋرالى بۇگىن ۇكىمەت وتىرىسىندا ق ر ۇلتتىق ەكونوميكا ءمينيسترى رۋسلان دالەنوۆ ايتتى، دەپ حابارلايدى قازاقپارات ءتىلشىسى.
«ساۋدا ساياساتى بويىنشا باعدارلاما ازىرلەنەدى. وتكىزۋ نارىقتارىنا قول جەتكىزۋدى قامتاماسىز ەتۋ جانە ەلەكتروندىق ساۋدانى دامىتۋ بويىنشا شارالار ىسكە اسىرىلادى. وسى جىلدىڭ سوڭىنا دەيىن جاڭا رەداكتسياداعى «تەحنيكالىق رەتتەۋ تۋرالى» زاڭ قابىلدانادى»، - دەدى مينيستر.
ونىڭ اتاپ وتۋىنشە، الەۋمەتتىك ساياسات بويىنشا الەۋمەتتىك سالاداعى زاڭناماعا تۇگەندەۋ جۇرگىزىلەدى. وسى جىلعى 1- شىلدەگە دەيىن ەلدىڭ زەينەتاقى جۇيەسىن جاڭعىرتۋ بويىنشا تاسىلدەر مەن شەشىمدەر ازىرلەنەدى. دەنساۋلىق ساقتاۋ سالاسىندا مەديتسينالىق قىزمەتتەردىڭ قولجەتىمدىلىگى مەن ساپاسىن ارتتىرۋ بويىنشا شارالار، ونىڭ ىشىندە دەنساۋلىق كودەكسى قابىلدانادى. كودەكستىڭ جوباسى اشىق جانە كەڭىنەن تالقىلانادى.
«ءبىلىم بەرۋ بويىنشا پەداگوگتاردى دايارلاۋ جۇيەسىن جەتىلدىرۋ جونىندە شارالار قابىلدانادى. عىلىمي- وندىرىستىك كلاستەرلەر قۇرۋ جانە ادامي كاپيتالدى دامىتۋ بويىنشا ۇسىنىستار ازىرلەنەدى»، - دەدى ول.
مينيستر مەملەكەت باسشىسىنىڭ تاپسىرماسىنا سايكەس، وسى جىلعى 15- مامىرعا دەيىن ورتا مەرزىمدى پەرسپەكتيۆاعا ارنالعان ەكونوميكالىق دامۋ جوسپارى قابىلداناتىندىعىن اتاپ ءوتتى.
«جۇمىس توبى ازىرلەگەن نەگىزگى شارالار جوسپارعا ەنەدى. ءاربىر ورتالىق مەملەكەتتىك ورگان جانە جەرگىلىكتى اتقارۋشى ورگان بەلسەندى قاتىسادى. جوسپار جوباسىن مازمۇندى پىسىقتاۋ ءۇشىن ساراپتامالىق قاۋىمداستىقتىڭ كەڭىنەن تالقىلاۋىنا شىعارىلادى. جۇمىس ورگانى رەتىندە ۇلتتىق ەكونوميكا مينيسترلىگىن ايقىنداۋ ۇسىنىلادى. جالپى العاندا، بۇل ءتاسىل ازىرلەنىپ جاتقان شارالاردى ءوزارا ۇيلەستىرۋگە ىقپال ەتەتىن بولادى. وسىلايشا، مەملەكەت باسشىسىنىڭ تاپسىرمالارىن ءىس جۇزىندە ىسكە اسىرۋ قامتاماسىز ەتىلەدى»، - دەدى رۋسلان دالەنوۆ.