قانداستار ءۇشىن دايىندىق كۋرسى اشىلىپ، 1 مىڭ گرانت ءبولىندى
سونداي-اق، شەتەلدەن كەلگەن قانداستارىمىز ءۇشىن ارنايى دايىندىق كۋرستارى جۇمىس ىستەي باستادى، دەپ حابارلايدى قازاقپارات.
«شەتەلدەگى قازاقتاردى اتامەكەنگە شاقىرۋدىڭ ءتۇرلى مۇمكىندىكتەرى بار. سونىڭ ءبىر جولى - جاس قانداستارىمىزدى ەلىمىزدەگى جوعارعى وقۋ ورىندارىنا تارتۋ. بۇل ارادا ءبىز نەگىزىنەن وزبەكستان، رەسەي، يران، موڭعوليا، قىتاي ەلدەرىنە ەرەكشە ءمان بەرەمىز. ويتكەنى، بۇل ەلدەردەگى ءبىلىم دەڭگەيى بىزدىكىنەن جوعارى ەمەس. سوندىقتان ولاردى جەڭىلدىكتەر جاساۋ ارقىلى وزىمىزگە تارتۋعا بولادى. «وتانداستار قورىنىڭ» قولداۋىمەن شەتتەن كەلەتىن جاستارعا ارناپ دايىندىق كۋرسى اشىلدى»، - دەپ جازدى «وتانداستار قورى» ا ق ءبىرىنشى ۆيتسە- پرەزيدەنتى تالعات ادۋوۆ ءوزىنىڭ Facebook پاراقشاسىندا.
ونىڭ ايتۋىنشا، 2019-2020 وقۋ جىلىندا اتالمىش كۋرسقا مەملەكەت تاراپىنان ەتنيكالىق قازاقتار ءۇشىن 1000 ورىندىق گرانت ءبولىندى.
«الايدا، كەلگەن قانداستارىمىزدىڭ سانى 1238 گە جەتتى. گرانتپەن قامتاماسىز ەتىلمەي قالعان جاستار ماسەلەسىن ۇكىمەت وتىرىسىنا دەيىن كوتەرىپ، ءبىلىم جانە عىلىم مينيسترلىگىنىڭ قولداۋىمەن بارلىعىن تۇگەل تەگىن وقۋعا ورنالاستىردىق. ءوز كۇشىمەن ج و و-نا شامامەن 1500 جاس، كوللەدجدەرگە 700 دەي تالاپكەر ءتۇستى. جالپى قازاقستانعا كەلىپ ءبىلىم الۋشى قانداستارىمىزدىڭ سانى 20 مىڭنان استى. سونىڭ نەگىزگى بولىگى كورشى وزبەكستاننان كەلدى. ولاردىڭ اراسىندا وزبەكستانداعى قازاق مادەني ورتالىعى بەلسەندى جۇمىس ىستەدى. بيىل وسى ەلدەن قازاقستانعا وقۋعا تۇسۋگە كەلەتىن جاستار سانىن تاعى ءوسىرۋ كوزدەلىپ وتىر»، - دەيدى ول.
سونداي-اق، ۆيتسە-پرەزيدەنت كورشى وزبەك ەلىندەگى قازاق مادەني ورتالىعىنىڭ وكىلدەرىمەن كەزدەسىپ، اتالعان ماسەلەلەردى تالقىعا سالعانىن العا تارتتى.
اۆتور: ءالي يبرايەۆ