قازاقستان قىرعىزستان ەكونوميكاسىنا 1 ميلليارد دوللاردان استام قارجى سالدى
«قازاق- قىرعىز قاتىناستارىنىڭ ماڭىزدى باسىمدىعى رەتىندە ورتاق شەكارانىڭ بولۋىن، رەتكە كەلتىرىلگەن كولىكتىك ينفراقۇرىلىمدى جانە ە ا ە و-داعى سەرىكتەستىكتى اتاپ وتكەن ءجون. وسىنىڭ ارقاسىندا، قازاقستان قىرعىزستاننىڭ الدىڭعى قاتارلى ساۋدا سەرىكتەستەرىنىڭ بىرىنە اينالدى»، - دەدى مەملەكەت باسشىسى جوعارى مەملەكەتارالىق كەڭەستىڭ بەسىنشى وتىرىسىندا.
سونىمەن قاتار، قاسىم-جومارت توقايەۆ بۇگىندە قىرعىزستان قازاقستاننىڭ ورتالىق ازياداعى ەڭ ءىرى ساۋدا سەرىكتەستەرىنىڭ ءبىرى ەكەنىن اتاپ ءوتتى.
«ءبىزدىڭ تاۋار اينالىم ءۇشىنشى جىل قاتارىنان تۇراقتى ءوسىمدى بايقاتىپ وتىر. 2015 -جىلدان 2018 -جىل ارالىعىندا ءوزارا ساۋدا كولەمى 30 پايىزعا ءوسىپ، 900 ميلليون دوللاردى قۇرادى. قازاقستان ەڭ ءىرى ينۆەستورلاردىڭ ءبىرى بولىپ وتىر، ياعني قىرعىز ەكونوميكاسىنا 1 ميلليارد دوللاردان استام قارجى سالدى»، - دەدى ق ر پرەزيدەنتى.
مەملەكەت باسشىسىنىڭ ايتۋىنشا، قىرعىزستاندا قازاقستاندىق كاپيتالدىڭ قاتىسۋىمەن 2 مىڭعا جۋىق كاسىپورىن جۇمىس ىستەپ جاتىر.
«قازاق ينۆەستورلارى تاۋ- كەن، قايتا وڭدەۋ، قۇرىلىس، ساۋدا، بانك سەكتورىندا، تەلەكوممۋنيكاتسيا سالاسىندا قامتىلعان. ولار قىرعىزستاننىڭ الەۋمەتتىك ومىرىنە بەلسەندى قاتىسىپ، جۇمىس ورىندارىن قۇرۋدا، سونداي-اق قارجى مەن تەحنولوگيانىڭ تارتىلۋىن ىنتالاندىرىپ كەلەدى. سوندىقتان قىرعىزستان ۇكىمەتى الداعى ۋاقىتتا دا قولداۋ ءبىلدىرىپ، قازاق ينۆەستورلارىنىڭ قىزمەتىنە قولايلى جاعداي جاساۋدى جالعاستىرادى دەپ ۇمىتتەنەمىز»، - دەدى قاسىم-جومارت توقايەۆ.
پرەزيدەنتتىڭ سوزىنە قاراعاندا، بۇگىندە قازاقستاندا قىرعىز كاسىپكەرلەرىنىڭ قاتىسۋىمەن 1 مىڭنان استام كاسىپورىن جۇمىس ىستەپ جاتىر.
«باۋىرلاستىق رۋحىندا شەكارالاس وڭىرلەردە ىنتىماقتاستىق دامىپ كەلەدى. ولاردىڭ ۇلەسىنە ەكىجاقتى تاۋار اينالىمىنىڭ 50 پايىزى تيەسىلى جانە بۇل كورسەتكىش تۇراقتى ءوسىپ كەلەدى. وسى جەتىستىكتەردىڭ بارلىعى ءبىزدىڭ مەملەكەتتەر اراسىنداعى ىنتىماقتاستىقتىڭ ەرەكشە مارتەبەسىن تاعى دا دالەلدەپ وتىر»، - دەدى مەملەكەت باسشىسى.
اۆتور: رۋسلان عابباسوۆ