الماتىدا 1 ميلليون اعاش وتىرعىزىلادى

الماتى. قازاقپارات - الماتى اكىمى باقىتجان ساعىنتايەۆ جۇمىس جيىنىن وتكىزىپ، مەگاپوليستى جاسىلداندىرۋ بويىنشا شەبەرلىك- جوسپاردىڭ جوباسىن تالقىلادى، دەپ حابارلايدى قازاقپارات ءتىلشىسى.

شەبەرلىك- جوسپارعا سايكەس، شاھاردا الداعى ءۇش جىلدا 1 ميلليون اعاش وتىرعىزۋ كوزدەلگەن. ونى جاساۋ كەزىندە الماتىنىڭ جاسىل جەلەكتەرى زەرتتەلدى جانە ونىڭ قازىرگى جاعدايى انىقتالدى. بۇل جۇمىسقا كاسىبي ماماندار تارتىلىپ، زەرتتەۋ بارىسىندا قالاداعى جاسىل جەلەكتىڭ جالپى كولەمى ءبىر ادامعا شاققاندا نەبارى 894 گا - 4,8 شارشى مەتر ەكەنى انىقتالدى. ال 70-80- جىلدارى بۇل كورسەتكىش 10 شارشى مەتردى قۇراعان. جاسىل جەلەكتىڭ ازايۋى قالا كولەمى مەن ادام سانىنىڭ ارتۋىنا بايلانىستى بولۋدا.

ايتا كەتەرلىگى، سوڭعى ءۇش جىل ىشىندە 134 مىڭعا جۋىق اعاش وتىرعىزىلدى. بيىل وتىرعىزىلعانى — 140 مىڭعا جۋىق.

مامانداردىڭ ايتۋىنشا، ميلليون اعاش پەن تال- شىلىكتى وتىرعىزۋدىڭ تيىمدىلىگى جوعارى. ياعني، جاسىل جەلەكتىڭ ارقاسىندا 118 ميلليون ك گ وتتەگى پايدا بولادى، قالانى جاسىلداندىرۋ ايماعى 5000 شارشى مەترگە دەيىن جەتەدى، جول جيەگىندەگى شۋدىڭ دەڭگەيى %40، جاسىل ايماقتان 1 شارشى مەتر راديۋستاعى شاڭ دەڭگەيى %75 تومەندەيدى.

سونىمەن قاتار، قالانى اباتتاندىرۋ دەڭگەيى ارتادى، دەمالىس ايماقتارى، سكۆەرلەر مەن ساياباقتار پايدا بولادى. مۇنىڭ بارلىعى پسيحولوگيالىق احۋالعا وڭ ىقپال ەتەدى جانە قالالىقتاردىڭ ءومىر سۇرۋىنە جايلى جاعداي جاسايدى.

«قالانى جاسىلداندىرۋدىڭ بارلىق جۇمىسى ءبىرىڭعاي جۇرگىزىلىپ، اعاشتاردى ستيحيالى تۇردە وتىرعىزۋعا نەمەسە قيۋعا بولمايدى. سوندىقتان شەبەرلىك- جوسپاردى ازىرلەپ جاتىرمىز» ، - دەپ اتاپ ءوتتى ب. ساعىنتايەۆ.

جيىندا دۇكەندەردىڭ، سالونداردىڭ جانە كاسىپكەرلىكتىڭ باسقا نىساندارىنىڭ سىرتىن جاۋىپ تۇراتىن اعاشتاردى كەسۋگە تىيىم سالىناتىنى باسا ايتىلدى. قايتارما اعاشتاردى وتىرعىزۋعا باقىلاۋ كۇشەيتىلەدى جانە كەسىلگەن اعاشتاردىڭ ورنىنا وتىرعىزىلاتىن جاسىل جەلەكتىڭ سانى ارتادى.

الماتى اكىمى باقىتجان ساعىنتايەۆ شەبەرلىك- جوسپارىن تولىقتىرۋ بويىنشا ءبىرقاتار تاپسىرمالار بەردى. ونىڭ ىشىندە، پيتومنيكتەردىڭ قۋاتى، جاسىل جەلەكتى وتىرعىزۋدىڭ جانە ولاردى كۇتىپ- باپتاۋدىڭ ءبىرىڭعاي ءادىسى مەن ەرەجەسى ءجىتى نازارعا الىنۋى ءتيىس.