ءار وتباسى ءۇشىن 1-شىلدەدەن باستاپ الەۋمەتتىك كارتا ەنگىزىلەدى
بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسىنىڭ سايلاۋالدى باعدارلاماسىنا سايكەس، ۇكىمەت 106 پۋنكتتەن تۇراتىن ءىس-شارالار قابىلداعان بولاتىن. سونىڭ 26 سىن ىسكە اسىرۋ مىندەتى ءبىزدىڭ مينيسترلىككە جۇكتەلگەن. وسى ايدىڭ 12سىندە قاسىم-جومارت كەمەل ۇلى مەملەكەتىمىزدىڭ دامۋىنىڭ 10 باعىتىن ايقىندادى. سونىڭ ىشىندەگى ءتورت باعىت ءبىزدىڭ مينيسترلىككە تاپسىرىلعان. ەڭ بىرىنشىدەن، حالىقتىڭ تابىسىن كوبەيتۋ مىندەتى جۇكتەلدى. وزدەرىڭىز بىلەتىندەي، بىلتىردان باستاپ ەلىمىزدە جالاقى 3 رەت ءوسىپ، ەڭ تومەنگى جالاقى 42500 تەڭگە بولدى. وعان قوسىمشا 1- قاڭتاردان باستاپ جۇمىس بەرۋشىلەر دە ەڭ تومەنگى ەڭبەكاقى الاتىن قىزمەتكەرلەرىنىڭ ايلىعىن ءوسىردى. ودان كەيىن مەملەكەت باسشىسىنىڭ تاپسىرماسىنا ساي، وسى ايدىڭ 1 نەن باستاپ تومەن جالاقى الاتىن بيۋجەتتىك مەكەمەلەردىڭ دە جالاقىلارى وسەدى. وسى شارانى جۇزەگە اسىرۋعا بيۋجەتتەن 144 ميلليارد تەڭگە قارجى قاراستىرىلعان»، - دەدى بەردىبەك ساپاربايەۆ.
ءمينيستردىڭ ايتۋىنا قاراعاندا، مەملەكەت تاراپىنان 39 ءتۇرلى مەملەكەتتىك كومەك كورسەتىلەدى. ونىڭ بارلىعىن ەسەپتەگەندە 3 ميلليوننان استام ادامعا، وعان قوسىمشا الەۋمەتتىك قامسىزداندىرۋ قورىنان دا 800 مىڭعا جۋىق قازاقستاندىققا 190 ميلليارد تەڭگە اقشا بولىنەدى.
«ءبىز ەندى وسى كومەكتى بەرۋ ءۇشىن الەۋمەتتىك كارتانى دايىنداپ جاتىرمىز. وسى ۋاقىتقا دەيىن وتباسىلاردىڭ الەۋمەتتىك كارتاسىنىڭ 97 پايىزى دايىن. 1- شىلدەگە دەيىن تولىق دايىن بولادى»، - دەدى ول.
بەردىبەك ساپاربايەۆ الەۋمەتتىك كارتادا مۇقتاج وتباسىعا قانشالىقتى كومەك قاجەت ەكەنى كورسەتىلەتىنىن اتاپ ءوتتى.
«سونىمەن قاتار، ءبىز مەملەكەت كورسەتەتىن بارلىق الەۋمەتتىك كومەكتىڭ ءبىرىڭعاي ستاندارتىن ازىرلەدىك. قازىرگى ۋاقىتتا جەرگىلىكتى اتقارۋشى ورگاندارمەن ءبىرىڭعاي كومەكتىڭ پاكەتى جاسالدى»، - دەدى ول.
ەسكە سالا كەتسەك، قازاقستانداعى ءار وتباسىندا بولاتىن الەۋمەتتىك كارتانى ازىرلەۋ جۇمىستارى 1- شىلدەگە دەيىن اياقتالاتىنىن ەڭبەك جانە حالىقتى الەۋمەتتىك قورعاۋ ءمينيسترى بۇعان دەيىن حابارلاعان بولاتىن.