شەتتەگى 1 ميلليون قازاق ەلگە كوشىپ كەلۋگە نيەتتى - زاۋىتبەك تۇرىسبەكوۆ

نۇر-سۇلتان. قازاقپارات - ق ر ەڭبەك جانە حالىقتى الەۋمەتتىك قورعاۋ مينيسترلىگى، «وتانداستار» قورى جانە دۇنيەجۇزى قازاقتارى قاۋىمداستىعى قانداستاردى قولداۋعا باعىتتالعان ءۇشجاقتى مەموراندۋمعا قول قويدى.

قۇجات سىرتتان قونىس اۋدارعان قانداستارمەن قاتار، شەتەلدەگى قازاق دياسپوراسىن دا دەمەۋدى كوزدەيدى، دەپ حابارلايدى قازاقپارات ءتىلشىسى.

شەتتەگى قازاقتاردى قولداۋ نەگىزىنەن مادەني-رۋحاني جانە الەۋمەتتىك تۇرعىدان بولماق. وسى باعىتتا اتالعان ءۇش مەكەمە ىنتىماقپەن جۇمىس ىستەۋگە بەكىنىپ وتىر.

«تاۋەلسىزدىكتىڭ 27 -جىلىندا شەتەلدەگى قازاقتاردىڭ ميلليوننان استامى قازاقستانعا كوشىپ كەلدى. قازىر دە كەلۋگە نيەتتىلەر بار. ولاردىڭ 60 پايىزى - جۇمىسقا جارامدى. بارلىعى ساۋاتتى. بىلتىردىڭ وزىندە ارنايى باعدارلاما اياسىندا 18 مىڭ ادامنان تۇراتىن 8 مىڭنان استام وتباسى كوشىپ كەلدى. ولاردى نەگىزىنەن ادامى از سولتۇستىك پەن شىعىستاعى وڭىرلەرگە كوپتەپ كوشىرۋىمىز كەرەك. شەتتەگى قازاقتاردى ىشكە تارتۋ تەك مەملەكەتتىك ورگاننىڭ مىندەتى عانا بولماۋى كەرەك. بۇگىنگى ءۇشجاقتى مەموراندۋم وسىعان دەيىن ءۇش بولەك جۇمىس ىستەپ كەلگەن ۇيىمداردىڭ باسىن بىرىكتىرىپ وتىر. ناتيجەسى دە جامان بولماۋى كەرەك»، - دەدى ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ.

 

ال دۇنيەجۇزى قازاقتارى قاۋىمداستىعى ءتوراعاسىنىڭ ورىنباسارى زاۋىتبەك تۇرىسبەكوۆتىڭ ايتۋىنشا، قازاقستانعا سىرتتان 1 ميلليون قازاق كوشىپ كەلۋگە نيەت بىلدىرگەن.

«وتكەندە عانا ميۋنحەندەگى كىشى قۇرىلتايعا 800 قازاق كەلدى. ەڭ ۇلكەن ماسەلە - ونداعى ۇلتى قازاق جاستار ءتىلى مەن ءداستۇرىن بىلمەيدى. جاسى 25 تەن ۇلكەندەر بولماسا، وعان دەيىنگىلەر مۇلدە قازاق ءتىلىن ۇمىتقان. وسىنىڭ جولىن كەسۋ ءۇشىن 2 جاستان باستاپ قازاق ءتىلىن ۇيرەتۋ جوباسىن دايىنداپ جاتىرمىز. سونداعى اعا بۋىن وكىلدەرى مۇنى ەستىپ، قاتتى قۋاندى. قولداپ جاتىر. بۇعان دەيىن ەلىمىزگە ءبىر ميلليوننان استام قازاق كوشىپ كەلسە، تاعى 1 ميلليون كوشىپ كەلۋگە نيەت ءبىلدىرىپ وتىر. ەندىگى مىندەت - سولارعا دۇرىس جاعداي جاساۋ. سولاردى ابىرويمەن قابىلداساق، وزگەلەر دە ويلانادى»، - دەدى زاۋىتبەك تۇرىسبەكوۆ.