زاۋىتبەك تۇرىسبەكوۆ: 1 ميلليون قانداسىمىز قازاقستانعا كەلەمىز دەپ وتىر
بۇل تۋرالى بۇگىن اقپارات جانە قوعامدىق دامۋ مينيسترلىگىنىڭ كەڭەيتىلگەن القا ماجىلىسىندە دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ ايتتى، دەپ حابارلايدى قازاقپارات ءتىلشىسى.
«شەتتە جۇرگەن قازاقتار 4-5 ميلليون دەپ ءجۇرمىز. ءبىز بارلىعىن ارالاپ شىقتىق. 1 ميلليون ادام ەلگە كەلەمىز دەپ وتىر. ءبىر جوبانى سارىاعاش اۋدانىندا، تاشكەنت توڭىرەگىندە جاساماقپىز. وزبەك اعايىندارمەن اقىلداسىپ، كەلىسىپ جاتىرمىز. سول جەردەن 400 گەكتار جەر الىپ، وزبەكستان جانە باسقا ەلدەردەن باستاپقىدا 35 جاسقا دەيىنگى ماماندىعى بار جاستاردى اكەلىپ، جۇمىس ورنىن قۇرىپ، ەت، ءسۇت ءوندىرىپ، ونى تاشكەنتكە جەتكىزەمىز. ارتىق ءونىمدى ەۋروپاعا نە سىبىرگە وتكىزەمىز»، - دەدى زاۋىتبەك تۇرىسبەكوۆ.
سونىمەن قاتار شەتەلدەگى قازاقتاردىڭ قازاق ءتىلىن ساقتاپ قالۋىنا قاتىستى پىكىرىمەن ءبولىستى.
«ءبىز ەرىكتىلەردى دايىنداپ، شەتتە ءومىر ءسۇرىپ جاتقان قازاق بالالارىنىڭ انا ءتىلىن 2 جاسىنان بويىنا ءسىڭىرۋدى كوزدەپ وتىرمىز. دەگەنمەن انا ءتىلىن ءبىلۋ قازاق بولۋ ەمەس. ونىڭ نامىسى، ارى بولۋى كەرەك. سول سەبەپتەن قازاقتىڭ بويىنا سونى ءسىڭىرۋ قاجەت. سوندىقتان قىسقا-نۇسقا ءۇش مينۋتتىق روليكتەر دايىنداپ جاتىرمىز»، - دەدى ول.