ەلباسى: ەلىمىزدىڭ ءىرى قالالارىندا جاستار ءۇشىن جىلىنا 1 مىڭ پاتەر سالىنادى
بۇل تۋرالى جاستار جىلىنىڭ اشىلۋىنا ارنالعان سالتاناتتى جيىندا ەلباسى نۇرسۇلتان نازاربايەۆ ءمالىم ەتتى، دەپ حابارلايدى قازاقپارات.
«باسپانا پروبلەماسىنىڭ وزەكتىلىگىن ەسكەرە وتىرىپ، قانشا قۇرىلىس جۇرگىزىلسە دە، ءىرى قالالاردا تۇرعىن ءۇي جاس وتباسىلارعا جەتكىلىكسىز بولىپ كەلەدى. وسى ورايدا تۇرعىندارى ميلليوننان اسقان ءۇش قالا بويىنشا ءتيىستى تاپسىرما بەرمەكپىن. اتاپ ايتقاندا، حالقى ميلليوننان اسقان شاھارلار كوبىرەك بولعانىن قالايمىن، سەبەبى وسىنداي قالالاردا ءبىلىم بەرۋ، عىلىم مەن مادەنيەتتىڭ دامۋ قارقىنى جوعارى بولادى. ساراپشىلاردىڭ ايتۋىنشا، الەمنىڭ 600 ءىرى قالاسى الەمدىك ءونىمنىڭ 60 پايىزىن ءوندىرۋ كورسەتكىشىنە جەتەدى. بىزدە ءىرى شاھار رەتىندە الماتى عانا بولعان ەدى، ەندى استانا مەن شىمكەنت تە وسى دەڭگەيگە جەتتى. تاعى دا ەكى قالا وسىنداي مەجەگە جەتۋ الدىندا تۇر. وسى ءىرى قالالاردا جىلىنا 1 مىڭنان كەم ەمەس پاتەر جۇمىس ىستەيتىن جاستار ءۇشىن سالاتىن بولامىز»، - دەدى نۇرسۇلتان نازاربايەۆ ۇكىمەتكە بەرگەن تاپسىرماسىندا.
مەملەكەت باسشىسىنىڭ اتاپ وتۋىنشە، وسى پاتەرلەر ارەندالىق باسپانا ساناتىنا جاتقىزىلۋى كەرەك.
سونىمەن قاتار پرەزيدەنت بۇل باعىتتاعى ماسەلەنى شەشۋگە «7-20-25» باستاماسى دا باعىتتالعانىن جەتكىزدى.
«وسىنداي باسپاناعا جۇمىس ىستەيتىندەر ءۇمىت ارتا الادى. جۇمىس - ول ءال-اۋقاتتىڭ نەگىزگى كوزى. ءبىز قازاقستاندا پاتەرناليزمدى دامىتقىمىز كەلمەيدى، ياعني بارلىعىن مەملەكەتكە جۇكتەپ قويعان دۇرىس ەمەس. وزدەرىڭىزدىڭ ىستەرىڭىزبەن مەملەكەتكە قولداۋ جاساۋلارىڭىز كەرەك. سوندىقتان جاس قىزمەتكەرلەر ءۇشىن باسپانا جاعدايىن جاساۋعا بارلىق مەنشىك تۇرىندەگى كاسىپكەرلەر بەلسەندى تۇردە قاتىسۋى قاجەت. بۇل تۇرعىدا ءبىزدىڭ بارشا ءىرى كومپانيالارعا ۇندەۋ جاساپ وتىرمىن»، - دەدى پرەزيدەنت.
ەسكە سالا كەتسەك، ق ر پرەزيدەنتى نۇرسۇلتان نازاربايەۆ قازاقستان حالقىنا بيىلعى جولداۋىندا 2019-جىلدى جاستار جىلى دەپ جاريالاۋدى ۇسىنعان بولاتىن.
پرەزيدەنت ءوز سوزىندە جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەكتىگىن ايتقان ەدى. ال، ارادا ءبىر ايدان استام ۋاقىت وتكەندە ەلباسى جارلىعىمەن 2019-جىل جاستار جىلى دەپ جاريالاندى.