ەركىن كۇرەس: بالۋاندارىمىز الەم چەمپيوناتىن 1 «كۇمىسپەن» اياقتادى

استانا. قازاقپارات - بۋداپەشتتە ءوتىپ جاتقان كۇرەس تۇرلەرىنەن الەم چەمپيوناتىندا ەركىن كۇرەس شەبەرلەرى جارىستى ءبىر كۇمىس مەدالمەن اياقتادى، دەپ حابارلايدى قازاقپارات ءتىلشىسى.

ق ر كۇرەس تۇرلەرى فەدەراتسياسى باسپا ءسوز قىزمەتىنىڭ حابارلاۋىنشا، ەركىن كۇرەستەن سوڭعى جارىس كۇنى بوز كىلەمگە شىققان 97 كەلىدەگى بالۋانىمىز مامەد يبراگيموۆ جۇبانىش سىنىندا ماكەدونيالىق ماگومەدگادجي نۋروۆتان 2:5 ەسەبىمەن ۇتىلىپ قالدى. بۇل سالماقتا رەسەيلىك ابدۋلراشيد سادۋلايەۆ چەمپيون اتاندى.

وسىعان دەيىن ەركىن كۇرەستەن 57 كەلىدەگى نۇريسلام سانايەۆ الەمدىك سىننىڭ كۇمىس جۇلدەسىن يەلەنگەنى تۋرالى جازعان بولاتىنبىز.

ەركىن كۇرەستەن قورىتىندى ەسەپتە 4 التىنعا قول جەتكىزگەن رەسەي قۇراماسى كوش باستادى. ال ءبىزدىڭ ەنشىمىزدە ءبىر كۇمىس مەدال عانا بار.

ەركىن كۇرەس شەبەرلەرىنەن كەيىن جارىس جولىنا قىزدار شىققان بولاتىن. وكىنىشكە قاراي، ايەلدەر كۇرەسىنەن كەشە ەشكىم جۇلدەلى ورىنعا قول جەتكىزە المادى. ريو وليمپياداسىنىڭ قولا جۇلدەگەرى ەكاتەرينا لاريونوۆا ەكىنشى اينالىمدا كانادالىق سپورتشىدان 0:11 ەسەبىمەن جەڭىلىس تاپتى. ال بۇگىن وليمپيادانىڭ تاعى ءبىر جۇلدەگەرى ەلميرا سىزدىقوۆا ەستونيالىق ەپپ ماەگە قارسى جۇبانىش بەلدەسۋىن وتكىزەدى.

اۆتور: كۇنسۇلتان وتارباي