بارلىق وڭىردە 1-ساناتتاعى اۆتوجولدار بولادى - جولداۋ

استانا. قازاقپارات - رەسپۋبليكالىق ماڭىزى بار ينفراقۇرىلىم قالىپتاستى. ەندىگى كەزەك - وڭىرلەردە. حالىققا ارنالعان بيىلعى جولداۋىن جاريالاۋ كەزىندە مەملەكەت باسشىسى نۇرسۇلتان نازاربايەۆ وسىلاي مالىمدەدى، دەپ حابارلايدى قازاقپارات ءتىلشىسى.

ونىڭ ايتۋىنشا، قازىرگى قالالاردىڭ ينفراقۇرىلىمدارى كاسىپورىندار مەن حالىقتىڭ تەز ءوسىپ جاتقان قاجەتتىلىگىنە ۇلگەرمەي جاتىر.

«نۇرلى جول» باعدارلاماسى بويىنشا سوڭعى جىلدارى رەسپۋبليكالىق ماڭىزى بار ينفراقۇرىلىمدى قالىپتاستىردىق. 2015 -جىلدان باستاپ ءۇش جىلدا رەسپۋبليكا بويىنشا  2400 شاقىرىم اۆتوجول سالىندى جانە جوندەۋدەن وتكىزىلدى. بۇل جۇمىستار جالعاسادى، 2020 -جىلعا دەيىن قوسىمشا  4600 شاقىرىم جول سالىنادى جانە جوندەلەدى. وسىلايشا، تۇتاس ەل ءبىرىنشى ساناتتاعى اۆتوكولىك جولى جەلىسىمەن قامتىلادى. ءدال وسى قادام حالىقتى جاقىنداستىرادى، بيزنەستىڭ دامۋىنا، ءوز تاۋارلارىن ساتۋعا مۇمكىندىك بەرەدى»، - دەپ اتاپ ءوتتى پرەزيدەنت.

ەلباسىنىڭ ايتۋىنشا، ەندى وڭىرلىك، قالالىق ينفراقۇرىلىمداردى دامىتۋ كەرەك.

«بۇل ءۇشىن بيىل قارجىلاندىرۋدى جەرگىلىكتى ماڭىزى بار جولدارعا - 150 ميلليارد تەڭگەگە دەيىن، اۋىلداردى سۋمەن قامتۋعا 100 ميلليارد تەڭگەگە دەيىن ۇلعايتۋ كەرەك. وبلىس ىشىندەگى اۋداندار اراسىندا جولداردىڭ ساپاسى ناشار. بارلىق جەرگە اۆتوبان سالۋ مىندەت ەمەس، قازىرگى جولداردى جۇرۋگە بولاتىنداي قالپىنا كەلتىرۋ كەرەك»، - دەدى نۇرسۇلتان نازاربايەۆ.

سونىمەن بىرگە، پرەزيدەنت حالىقتى تولعاندىرىپ جۇرگەن وزەكتى ماسەلەلەرگە باسىمدىق بەرۋدى تاپسىردى.

«بولىنگەن قاراجات ارقىلى اكىمدەر ەڭ الدىمەن، وڭىرلەردەگى كۇيىپ تۇرعان ماسەلەلەردى شەشۋى كەرەك. ۇكىمەت تە بۇل مىندەتكە جۇيەلى قاراپ، وزەكتى ينفراقۇرىلىمدىق ماسەلەلەردى جيناپ، جوبالاردى قاراستىرىپ، قارجىلاندىرۋ تەتىگىن ازىرلەۋى قاجەت. اۋىزسۋ، تۇرعىن- ءۇي كوممۋنالدىق ماسەلەلەر، جول - اۋىل ادامدارىن تولعاندىراتىن ماسەلەلەر وسى»، - دەدى نازاربايەۆ.

 ايتا كەتەيىك، مەملەكەت باسشىسى نۇرسۇلتان نازاربايەۆتىڭ بيىلعى جولداۋى ادەتتەگىدەي، ەلىمىزدىڭ الەۋمەتتىك- ەكونوميكالىق دامۋىنىڭ وزەكتى ماسەلەلەرىنە جانە قازاقستاندىقتاردىڭ ءال- اۋقاتىن ودان ءارى ارتتىرۋ مىندەتتەرىنە ارنالعان.

اۆتور: ايجان سەرىكجان قىزى