قازاقستاندا 1 - قازاننان باستاپ تەڭگەدەگى دەپوزيت شارتتارى وزگەرەدى

 الماتى. قازاقپارات - قازاقستاندا جەكە تۇلعالاردىڭ ۇلتتىق ۆاليۋتاداعى جيناق جانە جەدەل سالىمدارى سىياقىسىنىڭ شەكتى مولشەرلەمەسى بەكىتىلدى. بۇل تۋرالى رەتتەۋشى بانكتىڭ باسپا ءسوز قىزمەتى مالىمدەدى، دەپ حابارلايدى قازاقپارات ءتىلشىسى.

«بيىل 1 - قازاننان باستاپ جەكە تۇلعالاردىڭ ۇلتتىق ۆاليۋتادا ساقتاعان دەپوزيتتەرىنىڭ شارتتارىنا وزگەرىس ەنگىزىلدى. ەندى جەكە تۇلعالاردىڭ سالىمى جەدەل جانە جەدەل ەمەس جيناق بولىپ بولىنەدى» ، - دەلىنگەن ۇلتتىق بانكتىڭ حابارلاماسىندا.

سىياقى مولشەرلەمەسى سالىم ءتۇرى مەن مەرزىمىنە قاراي سارالاناتىن بولادى. سونداي- اق شۇعىل قايتارىپ الۋ نەمەسە تولتىرۋ قۇقىعىنا قاراي قاراستىرىلادى.

وسىعان وراي قازاقستاننىڭ دەپوزيتتەرگە كەپىلدىك بەرۋ قورى (KDIF) شەكتى مولشەرلەمەنى بەكىتتى.

KDIF ءوز قۇزىرەتىندەگى بانكتەر ءماجبۇرلى جاعدايدا جۇمىسىن توقتاتا قالسا، ونداعى ساقتالعان جەكە تۇلعالاردىڭ قارجىسىن (دەپوزيتەگى، ەسەپشوتتاعى سونداي- اق تولەم كارتاسىنداعى) قايتارۋعا كەپىلدىك بەرەدى. قازىرگى تاڭدا دەپوزيتتەردى كەپىلدەندىرۋ جۇيەسىنە 27 بانك قاتىسادى. KDIF كەپىلدىگى بارلىق جەكە كاسىپكەرلەر مەن جەكە تۇلعالارعا جارايدى.

جيناقتى شەتەل ۆاليۋتاسىمەن جۇرگىزەتىندەر ءۇشىن بۇرىنعى ءادىس قالا بەرمەك. ياعني سىياقى مولشەرلەمەسى سالىم مەرزىمىنە قاراماستان 1 پايىزدىق دەڭگەيىن ساقتاپ تۇرادى.

«سالىمداردى جىكتەۋ مەن سىياقىنىڭ شەكتى مولشەرىن بەكىتۋ 1 - قازاننان كەيىنگى دەپوزيتتەرگە قاتىستى. وعان دەيىنگىلەرى بۇرىنعى كەلىسىمشارتتا كورسەتىلگەندەي جالعاسا بەرەدى» ، - دەدى ۇلتتىق بانك باسپا ءسوز قىزمەتى.