قازاقستاندا سالماعى 1 كەلىلىك مەتال اقشالار اينالىسقا ەنگىزىلدى

استانا. قازاقپارات - 20 -ماۋسىم كۇنى قازاقستاننىڭ ۇلتتىق بانكى كۇمىستەن جاسالعان نومينالى 5000 جانە 500 تەڭگەلىك جانە مەلحيور قوسپاسىنان دايىندالعان نومينالى 100 تەڭگەلىك «استانا 20 جىل» كوللەكسيالىق مونەتالارىن اينالىسقا شىعارادى، دەپ حابارلايدى قازاقپارات.

ۇلتتىق بانكتەن اتاپ وتكەندەي، شاقالار «ەستە قالاتىن وقيعالار مەن ءبىرتۋار ادامدار» مونەتالار سەرياسىنان استانانىڭ 20 جىلدىعىنا ارنالىپ شىعارىلدى.

 

نومينالى 5000 تەڭگەلىك مونەتالار 925 سىنامالى كۇمىستەن جاسالعان، ماسساسى - 1 كەلى، ديامەترى - 100 م م، دايىنداۋ ساپاسى - «proof»، تارالىمى - 200 دانا.

نومينالى 500 تەڭگەلىك مونەتالار 925 سىنامالى كۇمىستەن جاسالعان، ماسساسى - 31,1 گرامم، ديامەترى - 38,61 م م، دايىنداۋ ساپاسى - «proof» ، تارالىمى - 2000 دانا.

نومينالى 100 تەڭگەلىك مونەتالار (م ن 25) مەلحيور قوسپاسىنان جاسالعان، ماسساسى - 11,17 گرامم، ديامەترى - 31 م م، دايىنداۋ ساپاسى «brilliant uncirculated»، تارالىمى - 30 مىڭ دانا.

 

بارلىق كوللەكسيالىق مونەتالار قازاقستان رەسپۋبليكاسىنىڭ بۇكىل اۋماعىندا كورسەتىلگەن قۇنىمەن تولەمنىڭ بارلىق تۇرلەرى بويىنشا، سونداي-اق بانك شوتتارىنا ەسەپتەۋ ءۇشىن جانە اۋدارىم جاساۋ ءۇشىن قابىلدانۋعا مىندەتتى. قازاقستان رەسپۋبليكاسىنىڭ بارلىق بانكتەرىندە شەكتەۋسىز ۇساقتالادى جانە ايىرباستالادى.

مونەتالار كوللەكسيالىق قۇنى بويىنشا ساتۋعا ارنالعان. «Proof» ساپاسىمەن جاسالعان كۇمىس مونەتالار كادەسىيلىق وراۋمەن شىعارىلادى. ال «Brilliant uncirculated» ساپالى مەلحيور قوسپاسىنان جاسالعان مونەتالار ساتۋ ءۇشىن ارنايى پوليگرافيالىق وراۋعا سالىنعان.

مونەتالاردى قازاقستان رەسپۋبليكاسى ۇلتتىق بانكىنىڭ بارلىق فيليالدارىندا، سونداي-اق «مونەتالاردىڭ ينتەرنەت- دۇكەنى» www.nationalbank.kz ق ر ۇ ب سايتىنىڭ ينتەرنەت - دۇكەنى ارقىلى ساتىپ الۋعا بولادى.