ۇكىمەت قاۋلىسىمەن بالالاردى 1-سىنىپقا قابىلداۋ ەرەجەلەرى وزگەردى
«باستاۋىش، نەگىزگى ورتا جانە جالپى ورتا ءبىلىم بەرۋ ۇيىمدارىنا وقۋعا قابىلداۋ قاعيدالارىنا سايكەس، جالپى ءبىلىم بەرەتىن وقۋ باعدارلاماسىن ىسكە اسىراتىن ءبىلىم بەرۋ ۇيىمدارى دايىندىق دەڭگەيىنە قاراماستان، ءبىلىم بەرۋ ۇيىمدارىنىڭ قىزمەت كورسەتۋ اۋماعىندا تۇراتىن جەتى جاسقا تولعان جانە اعىمداعى جىلى التى جاسقا تولاتىن بالالاردىڭ ءبىرىنشى سىنىپقا قابىلدانۋىن قامتاماسىز ەتەدى»، - دەلىنگەن باسپا ءسوز قىزمەتىنىڭ رەسمي حابارلاماسىندا.
ياعني، قىركۇيەك- جەلتوقسان ايلارىندا تۋعان بالالار اعىمداعى جىلدان باستاپ 1 -سىنىپقا بارا الادى. ويتكەنى، بالالار كۇنتىزبەلىك جىلدىڭ سوڭىنا دەيىن التى جاسقا تولىپ، مەكتەپكە قابىلدانۋ قۇقىعىنا يە بولادى.
«ءبىلىم الۋشىنىڭ اتا-انالارى نەمەسە وزگە دە زاڭدى وكىلدەرى ءبىلىم الۋ ءۇشىن كەز كەلگەن ءبىلىم بەرۋ ۇيىمىن تاڭداۋعا قۇقىلى. ءبىلىم بەرۋ ۇيىمىنا قابىلداۋدان باس تارتقان جاعدايدا، ءبىلىم الۋشىنىڭ اتا-انالارى نەمەسە باسقا زاڭدى وكىلدەرى جەرگىلىكتى ءبىلىم باسقارمالارىنا شاعىمدانا الادى»، - دەپ حابارلادى مينيسترلىك.
سونداي-اق، ءبىرىنشى سىنىپقا بالالاردى قابىلداۋعا قاجەتتى قۇجاتتار تىزىمىنەن مەكەنجاي انىقتاماسى الىپ تاستالدى.
قۇجاتتاردى قابىلداۋ 1 -ماۋسىم مەن 30 -تامىز ارالىعىندا جۇرگىزىلەدى.
ايتا كەتەيىك، ق ر ۇكىمەتىنىڭ ءتيىستى قاۋلىسى باسپا ءسوز بەتتەرىندە جاريالانعان بولاتىن.