قاراعاندىدا جىرشى- جىراۋلاردىڭ 1 - حالىقارالىق فەستيۆالى ءوتتى

None
None
قاراعاندى. قازاقپارات - قاراعاندى وبلىسىندا 11-12 - مامىردا بۇقار جىراۋدىڭ 350 جىلدىعىنا ارنالعان جىرشىلاردىڭ حالىقارالىق فەستيۆالى ءوتتى. وعان قازاقستان، رەسەي، موڭعوليا، قىرعىزستان جانە قاراقالپاقستاننان كەلگەن جىرشى- جىراۋلار قاتىستى،

دەپ حابارلايدى قازاقپارات ءتىلشىسى.

فەستيۆال «رۋحاني جاڭعىرۋ» باعدارلاماسى اياسىندا ۇيىمداستىرىلدى. كورەرمەندەر الماس الماتوۆ، بەكبولات تىلەۋحانوۆ، ەربولات شالدىبەكوۆ (استانا)، بايانعالي ءالىمجانوۆ (كوكشەتاۋ ق.)، مايا سارسەنبايەۆا، مارات سۇگىرباي، بيداس رۇستەمبەكوۆ ( قىزىلوردا ق.)، فارحات ورازوۆ (ب ق و)، دەمەۋباي جولىمبەتوۆ (اقتوبە ق.)، شاتتىق ۋاتقان، قازبەك ادىكە (الماتى)، داۋرەنبەك اركەنوۆ، ديدار قاميەۆ (قاراعاندى ق.)، ارمات يسلامعاليەۆ (ورال) جانە اماندىق كومەكوۆتىڭ (ماڭعىستاۋ) جىر- داستاندارىن تىڭدادى.

شەتەلدىك قاتىسۋشىلاردىڭ ىشىنەن رەسەي فەدەراتسياسىنىڭ التاي رەسپۋبليكاسىنداعى تولەڭگىت حالقىنىڭ وكىلى، جىرشى، «وسكۋس ۋۋل» (التاي رەسپۋبليكاسى) ەپوسىن ورىنداۋشى، حالىقارالىق بايقاۋىنىڭ بىرنەشە دۇركىن جەڭىمپازى ايدىن قۇرمانوۆ، قىرعىزستانداعى بىرنەشە حالىقارالىق جانە رەسپۋبليكالىق بايقاۋلاردىڭ جەڭىمپازى، «قۇرمانبەك» ەپوسىن ورىنداۋشى ايپەرى قۇلبايەۆا، قاراقالپاقستاننان كەلگەن «اساۋ- باراق» ەپوسىن ورىنداۋشى، تانىمال جىرشى ناۋرىزبەكتىڭ شاكىرتى، بەسقالا جىرشىلار مەكتەبىنىڭ وكىلى رينات تاجىبايەۆ، موڭعول رەسپۋبليكاسىنىڭ حالىق ءارتىسى، «نارانحۋۋ حاان» ەپوسىن ورىنداۋشى، جىرشى اۆيرمەد بالداندورج ءوز ونەرىن پاش ەتتى.

11 - مامىر كۇنى فەستيۆالگە قاتىسۋشىلار بوتاقارا كەنتىندەگى بۇقار جىراۋدىڭ ەسكەرتكىشىنە باردى. سونىمەن قاتار، جەرگىلىكتى مادەنيەت ۇيىندە ولار وزدەرىنىڭ كونسەرتتىك باعدارلاماسىن كورسەتتى.

12 - مامىر كۇنى ستانيسلاۆسكي اتىنداعى ورىس دراما تەاترىندا جىرشىلاردىڭ فەستيۆالى بولىپ ءوتتى. فەستيۆال اياسىندا سونداي- اق، كورەرمەندەر تاتتىمبەت اتىنداعى حالىق اسپاپتارى اكادەميالىق وركەستىرىنىڭ كونسەرتى، قالي بايجانوۆ اتىنداعى كونسەرتتىك بىرلەستىكتىڭ جانە حالىقارالىق بايقاۋلاردىڭ لاۋرەاتى نۇربەك تەمىربەكوۆتىڭ ونەرىنە كۋا بولدى.

جىرشىلار فەستيۆالىنىڭ اقتىق كەزەڭىندە بارلىق قاتىسۋشىلارعا اقشالاي سەرتيفيكاتتار تابىس ەتىلدى.

ايان بەكەن ۇلى

سوڭعى جاڭالىقتار