ماڭعىستاۋدا 1 پايىز نەسيە بەرەتىن باعدارلاما ىسكە قوسىلدى
شاراعا قازاقستان رەسپۋبليكاسىنىڭ «اتامەكەن» ۇلتتىق كاسىپكەرلەر پالاتاسى پرەزيديۋمىنىڭ ءتوراعاسى تيمۋر قۇلىبايەۆ، ماڭعىستاۋ وبلىسىنىڭ اكىمى ەرالى توعجانوۆ، قالا مەن اۋدان اكىمدەرى، كاسىپكەرلەر قوعامدىق بىرلەستىكتەرىنىڭ، ەكىنشى دەڭگەيلى بانكتەردىڭ، قارجى ينستيتۋتتارىنىڭ وكىلدەرى قاتىستى.
ەلباسى نۇرسۇلتان نازاربايەۆتىڭ «بەس الەۋمەتتىك باستاماسىنىڭ» ءبىرى - شاعىن نەسيەنى كەڭەيتۋ. مەملەكەت باسشىسى بۇل باستامانىڭ مىڭداعان ادامعا ءوز بيزنەسىن اشۋعا مۇمكىندىك بەرەتىنىن اتاپ ءوتتى. ماڭعىستاۋ وبلىسىنداعى ەلباسى تاپسىرمالارىن ىسكە اسىرۋ جانە قولداۋ ماقساتىندا شاعىن جانە ورتا بيزنەس نەسيەلەرىن جىلىنا 1 پايىز بەرەتىن «Nur Kapital» باعدارلاماسى ىسكە قوسىلدى. بۇل جوبانى مەملەكەت باسشىسى قولداپ، ماقۇلدادى.
«ءبىز حالىقتىڭ قوعامدىق سانا-سەزىمىن جاڭعىرتۋ ءۇشىن شاعىن جانە ورتا بيزنەستى دامىتۋعا ناقتى جاعداي تۋعىزۋ مىندەتىن قويدىق. قازىرگى ۋاقىتتا جالپى نەسيە پورتفەلى 2,7 ميلليارد تەڭگەنى قۇرايدى (ونىڭ ىشىندە جەرگىلىكتى بيۋدجەتتەن 900 ميلليون تەڭگە، «دامۋ» قورىنان 1,800 ميلليون تەڭگە). بۇگىنگى تاڭدا «قازاقستان حالىق بانكى» ا ق ماڭعىستاۋ وبلىستىق فيليالىمەن (400 ميلليون تەڭگە)، «قازاقستان حالىق بانكى» ا ق- نىڭ جاڭاوزەن وڭىرلىك فيليالىمەن (400 ميلليون تەڭگە) جانە «ForteBank» ا ق (322 ميلليون تەڭگە)، «سبەربانك روسسي» ا ق ە ب (150 ميلليون تەڭگە) كەلىسىمگە قول قويىلدى. سونداي-اق، وسى باعدارلاماعا قاتىسۋ ءۇشىن «بانك سەنتركرەديت» ا ق جانە «اتامەكەن ميكروفينانس» ج ش س وتىنىمدەرىن بەردى»، - دەدى ماڭعىستاۋ وبلىسىنىڭ اكىمى ەرالى توعجانوۆ.
«Nur Kapital» باعدارلاماسىنا قاتىسقىسى كەلەتىن بارلىق كاسىپكەر قاجەتتى قۇجاتتاردى دايىنداۋ جانە جيناۋمەن اينالىساتىن جاڭاوزەن قالاسىنداعى جانە وبلىستاعى بيزنەس-بولىمشەلەرگە ءوز وتىنىمدەرىمەن جۇگىنە الادى. سونداي-اق، كاسىپكەر بارلىق قاجەتتى قۇجاتتى ەكىنشى دەڭگەيلى بانكتەرگە تاپسىرىپ، ماقۇلدانعان سوڭ بانكپەن بىرلەسىپ، سۋبسيديا الۋ ءۇشىن قۇجاتتاردى وبلىستىق ۇيلەستىرۋ كەڭەسىنە جىبەرەدى. ايماقتىق ۇيلەستىرۋ كەڭەسى ءاربىر اۋدان ءۇشىن ماڭىزدى دەپ تانىلعان جوبالاردى قاراستىرادى.
«قازىرگى تاڭدا وبلىستاعى قالالار مەن اۋداندار اكىمدىكتەرىندە 2 ميلليارد تەڭگەدەن استام قارجىعا كاسىپكەرلەر تاراپىنان 192 ءوتىنىم كەلىپ ءتۇستى. ولاردىڭ 35 پايىز مال شارۋاشىلىعى سەكتورىندا، وڭدەۋ، جەڭىل ونەركاسىپ - 22 پايىز، تۋريزم - 16 پايىز، كولىك جانە قويما - 8 پايىز، وسىمدىك شارۋاشىلىعى - 5 پايىز، دەنساۋلىق ساقتاۋ - 5 پايىز، قىزمەت كورسەتۋ - 3 پايىز، ءبىلىم بەرۋ - 3 پايىز، تاماقتانۋ قىزمەتتەرى - 1 پايىز، كوتەرمە جانە بولشەك ساۋدا - 1 پايىز، ينۆەستيتسيالار - 0,3 پايىز، ونەر، ويىن-ساۋىق جانە دەمالىس - 0,1 پايىز»، - دەدى ماڭعىستاۋ وبلىستىق كاسىپكەرلىك جانە ساۋدا باسقارماسىنىڭ باسشىسى ۆەنەرا مۇستاپايەۆا.
كەزدەسۋ بارىسىندا 2018-جىلدىڭ قاڭتارىنان باستاپ ماڭعىستاۋ وبلىسىندا جۇزەگە اسىرىلعان «كاسىپكەر بولامىن!» اتتى پيلوتتىق جوبا تانىستىرىلدى. كاسىپكەرلىك نەگىزدەرىندەگى ويىن جاتتىعۋلارىنىڭ جوباسى الەۋمەتتىك- ءبىلىم بەرۋدى كوزدەيدى: وقۋشىلار اراسىندا كاسىپكەرلىك سانانى دامىتۋ، بيزنەستى جۇرگىزۋ ادىستەرى مەن قۇرالدارىن ۇسىنۋ.
اتالمىش جوبانىڭ باستاماسى اياسىندا وبلىستىڭ 12 پيلوتتىق مەكتەبىندە 365 جوعارى سىنىپ وقۋشىلارىنا ارنالعان 14 بيزنەس- ترەنەر فاكۋلتاتيۆتى ساباقتار وتكىزەدى. سونىمەن قاتار، بيزنەس- ترەنەرلەر مەن ولاردىڭ ستۋدەنتتەرى اراسىنداعى كونكۋرس باستالىپ، 150 جەڭىمپازعا حالىقارالىق بيزنەس- ترەنەرلەردىڭ قاتىسۋىمەن بيزنەس- لاگەر ۇيىمداستىرىلادى. جەڭىمپازدار ايماقتىڭ ءىرى كاسىپكەرلەرى، «دامۋ» قورى جانە «اتامەكەن» كاسىپكەرلەر پالاتاسى» گرانتتارىمەن قامتاماسىز ەتىلەدى.