22:25, 04 - شىلدە 2022 | GMT +6
بۋرابايدا 19 جاستاعى استانالىق تاۋدان قۇلاپ اۋرۋحاناعا ءتۇستى
كوكشەتاۋ. قازاقپارات - بۋرابايدا 19 جاستاعى استانالىق تاۋدان قۇلاپ، اياعىن سىندىرىپ الدى، دەپ حابارلايدى قازاقپارات ءتىلشىسى.
اقمولا وبلىستىق ت ج د باسپا ءسوز قىزمەتىنىڭ مالىمەتىنشە، كەلەڭسىز جاعداي بۇگىن ساعات 16:47 شاماسىندا «تۋفەلكا» تاۋىندا بولعان.
«تاۋعا كوتەرىلمەكشى بولعان نۇر-سۇلتان قالاسىنىڭ 19 جاستاعى تۇرعىنى 20 مەتر بيىكتىكتەن قۇلاپ كەتتى. سالدارىنان جىگىتتىڭ اياعى سىنىپ، ءتۇرلى دەنە جاراقاتىن الدى. وعان قۇتقارۋ بەكەتى باسشىسىنىڭ مىندەتىن اتقارۋشى ماكسيم پونوماريەۆ باستاعان قۇتقارۋشىلار - الەكساندر پوپوۆ، الىبەك ايتجانوۆ، ەۆگەني لياحوۆ كومەككە كەلدى. قۇتقارۋشىلار زارداپ شەككەندى زەمبىل ارقىلى تاۋ ەتەگىندە تۇرعان جەدەل جاردەم كولىگىنە جەتكىزدى»، - دەدى ۆەدومستۆودان.
وسى رەتتە، ت ج د قىزمەتكەرلەرى دەمالۋشىلارعا تاۋداعى قاۋىپسىزدىك شارالارىن ساقتاۋ قاجەتتىگىن ەسكەرتەدى.
ايتا كەتسەك، بۇدان بۇرىن بۋراباي تاۋىندا 53 جاستاعى ايەل قۇلاپ، اياعىن سىندىرىپ الدى.