قازاقپارات كۇنتىزبەسى: 19- اقپان
اتاۋلى كۇندەر بۇكىل الەمدىك كيتتەر كۇنى
بۇكىل الەمدىك كيتتەر كۇنى - 1986-جىلى حالىقارالىق كيت اۋلاۋ (International Whaling Commission - IWC) كوميسسياسىندا بەكىتىلگەن. سول جىلى 19- اقپاندا حالىقارالىق كيت اۋلاۋ كوميسسياسى دۇنيەجۇزىندە كيت اۋلاۋ مەن كيت ەتىن ساتۋعا تىيىم سالعان.
ءبىراق 19- اقپان كيتتەردى عانا ەمەس، سونىمەن بىرگە بارلىق مۇحيت پەن تەڭىز سۇتقورەكتىلەرىن قورعاۋ كۇنى.
كەيدە ءار مەملەكەتتىڭ ەكولوگيالىق ۇيىمدارى جينالىپ، وسى كۇندى مۇلدەم جويىلۋ الدىندا تۇرعان بىرەگەي ءبىر سۇتقورەكتىنى قورعاۋعا ارنايدى.
ەستە قالار وقيعالار
1992-جىلى قازاقستان مەن اۋستريا رەسپۋبليكالارى اراسىندا الداعى ۋاقىتتا ساياسي-ەكونوميكالىق ىنتىماقتاستىقتى دامىتۋ ماقساتىندا ديپلوماتيالىق قارىم-قاتىناس ورناتىلدى.
1994-جىلى قازاقستان رەسپۋبليكاسىنىڭ پرەزيدەنتى «ادام قۇقىعى جونىندەگى رەسپۋبليكالىق كوميسسيا قۇرۋ تۋرالى» جارلىققا قول قويدى.
1994-جىلى قازاقستان رەسپۋبليكاسىنىڭ قۇراماسى تاۋەلسىز ەل رەتىندە العاش رەت نورۆەگيانىڭ ليللەحاممەر قالاسىندا وتكەن XVII قىسقى وليمپيادا ويىندارىنا قاتىستى. وندا قازاقستاندىق سپورتشىلار ءبىر التىن جانە ەكى كۇمىس جۇلدەنى جەڭىپ الدى.
2009-جىلى يراننىڭ گۇلىستان پروۆينتسياسىنىڭ ورتالىعى گورگان قالاسىندا قازاقستاننىڭ باس كونسۋلدىعى رەسمي تۇردە اشىلدى.
2013-جىلى تاراز قالاسىنىڭ ماڭىندا ساق التىنىنىڭ بولىكتەرى تابىلعان قورعاندار قازىپ الىندى.
2013-جىلى قازاقستان مەن يتاليا اراسىندا اۋعانستاننان اسكەري مۇلىك جانە پەرسونالدى ق ر اۋماعى ارقىلى اۋە جانە تەمىرجول ارقىلى ترانزيتتەۋ تۋرالى كەلىسىمگە قول قويىلدى.
2014-جىلى اقتاۋدا تۇرىكمەنستاننىڭ كونسۋلدىعى اشىلدى. بۇل ەكى ەل اراسىنداعى مادەني-گۋمانيتارلىق جانە ەكونوميكالىق بايلانىستاردى نىعايتۋعا مۇمكىندىك بەرەدى.
2015-جىلى ماسكەۋدەگى ارداگەرلەر ۇيىندە ەكى مارتە كەڭەس وداعىنىڭ باتىرى، اۆياتسيا گەنەرال-مايورى ت. بيگەلدينوۆ تۋرالى «پودنياتسيا ۆ ۆوزدۋح!» اتتى دەرەكتى فيلمنىڭ تۇساۋكەسەرى ءوتتى.
بۇل تاريحي دەرەكتى فيلم ۇلى وتان سوعىسىنا اتتانعان 19 جاستاعى تالعات بيگەلدينوۆتىڭ تاعدىرى تۋرالى باياندايدى.
1942-جىلدان 1945-جىلعا دەيىن قان مايداندا تالاي قيىندىقتاردى باستان كەشىپ، ەرلىكتىڭ ماڭگى وشپەس ۇلگىلەرىن كورسەتكەن باتىردىڭ تاعدىرى ەشكىمدى دە بەيجاي قالدىرمايدى. تالعات بيگەلدينوۆ ءوزىنىڭ يل-2 شابۋىلداۋشى ۇشاعىمەن كاۆكاز بەن ۋكراينا جەرىن جاۋدان ازات ەتۋ وپەراتسيالارىنا قاتىسقان، العاشقىلاردىڭ ءبىرى بولىپ بەرليندى بومبىلاعان.
بۇل ۇشاقتى فاشيستەر «قارا اجال» دەپ اتاعان. اتى اڭىزعا اينالعان ۇشقىشتىڭ 1966-جىلى جازعان «يلدەر شابۋىلدايدى» اتتى كىتابى فيلمنىڭ نەگىزگى ارقاۋىنا اينالعان.
2015-جىلى ق ر ۇلتتىق كىتاپحاناسى «ءبىر ەل - ءبىر كىتاپ» اكسياسى اياسىندا جالپىعا بىردەي وقۋعا باستى كىتاپ بولىپ ءىلياس ەسەنبەرليننىڭ «كوشپەندىلەر» رومان-تريلوگياسى تاڭدالدى.
2015-جىلى الماتىدا ارميا گەنەرالى، كەڭەس وداعىنىڭ باتىرى، حالىق قاھارمانى، قازاقستاننىڭ العاشقى قورعانىس ءمينيسترى ساعادات نۇرماعامبەتوۆتىڭ وتباسىنا Ⅱ دارەجەلى ۇ و س وردەنىن تاپسىرۋ ءراسىمى ءوتتى.
ساعادات نۇرماعامبەتوۆ وتان سوعىسى وردەنىنە 1985-جىلى ۇسىنىلعان. الايدا ناگرادا وعان جەتپەي قالعان.
2018-جىلى قازاقستان رەسپۋبليكاسى پرەزيدەنتىنىڭ 2017-جىلعى 26-قازانداعى «قازاق ءتىلى ءالىپبيىن كيريلليتسادان لاتىن گرافيكاسىنا كوشىرۋ تۋرالى» 569№ جارلىعىنا وزگەرىستەر ەنگىزىلدى.