اقمولا وبلىسىنىڭ اكىمى 19 جاستاعى فۋتبولشىنىڭ ءولىمىن جەكە باقىلاۋىنا الدى

None
None
كوكشەتاۋ. قازاقپارات - اقمولا وبلىسىنىڭ اكىمى ەرمەك مارجىقپايەۆ كوز جۇمعان 19 جاستاعى فۋتبولشى رومان زيۋزيننىڭ وتباسىنا كوڭىل ايتىپ، بۇل ءىستى جەكە باقىلاۋىنا الاتىنىن ايتتى، دەپ حابارلايدى «قازاقپارات» ح ا ا ءتىلشىسى.

«بىرىنشىدەن، روماننىڭ اتا-اناسىنا قايعىرىپ، كوڭىل ايتامىن. ەكىنشىدەن، بولەك كوميسسيا قىزمەتتىك تەرگەۋ جۇرگىزەتىن بولادى. ماسەلەنى جەكە باقىلاۋىما الامىن»، - دەپ جازدى ەرمەك مارجىقپايەۆ Instagram-دا.

ەسكە سالا كەتەيىك، «وقجەتپەس» كومانداسىنىڭ قۇرامىندا ويناعان 19 جاستاعى فۋتبولشى 14- تامىز كۇنى كوكشەتاۋدا كوز جۇمدى.

دارىگەرلەر ونىڭ ءولىمىنىڭ سەبەبىن «اۋرۋحاناعا كەش قارالۋ، سەپسيستىك جاعدايمەن اسقىنا تۇسكەن ءىرىڭدى قابىنۋ پروتسەسى» دەپ اتادى.

كەيىن رومان زيۋزيننىڭ تۋعان-تۋىستارى الەۋمەتتىك جەلى ارقىلى ەم-دومنىڭ دۇرىس جۇرگىزىلمەگەندىگىنە قوعامنىڭ نازارىن اۋدارتپاق بولدى.

اقمولا وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، فۋتبولشىنىڭ اتا-اناسىنىڭ الەۋمەتتىك جەلىدەگى جازباسى بويىنشا «مەديتسينالىق نەمەسە فارماتسيەۆتيكالىق قىزمەتكەردىڭ ءوز كاسىبي مىندەتىن دۇرىس ورىنداماۋى» بابىمەن سوتقا دەيىنگى تەرگەپ-تەكسەرۋ امالدارى باستالدى.

سوڭعى جاڭالىقتار