وسكەمەندە كوروناۆيرۋس جۇقتىرعان قارت زەينەتكەرمەن 198 ادام بايلانىستا بولعان

وسكەمەن. قازاقپارات - وسكەمەن قالاسىندا كوروناۆيرۋس جۇقتىرعان العاشقى ادام تىركەلدى، دەپ حابارلايدى قازاقپارات.

ش ق و دەنساۋلىق ساقتاۋ باسقارماسىنىڭ باسشىسى ءىلياس مۇحامەدجاننىڭ ايتۋىنشا، جۇقپالى ىندەتكە 1938 -جىلعى ايەل ادام شالدىققان. ول دارىگەرلەرگە 1-ءساۋىر كۇنى ءوزى جۇگىنىپتى. «ناۋقاس بىردەن اۋرۋحاناعا جەتكىزىلىپ، رەنتگەنولوگيالىق زەرتتەۋلەر جاسالدى. وعان «پنيەۆمونيا» دياگنوزى قويىلعان. پاتسيەنتتەن كوروناۆيرۋسكە قاتىستى الىنعان سىناما وڭ ناتيجە كورسەتتى»، - دەيدى ول.

باسقارما باسشىسىنىڭ سوزىنە سەنسەك، زەينەتكەر قاڭتار ايىندا رەسەيگە بارىپ كەلگەن. قازىرگى ۋاقىتتا ناۋقاسپەن بايلانىستا بولعان 198 ادام انىقتالىپ وتىر. ولاردىڭ بارلىعى وقشاۋلاندى.

ايتا كەتەيىك، وسىمەن ش ق و-دا كوروناۆيرۋس جۇقتىرعان 3 ادام تىركەلدى. بۇعان دەيىن مىسىردان دەمالىستان كەلگەن سەمەي قالاسىنىڭ 2 تۇرعىنىنان ۆيرۋس انىقتالعان بولاتىن.

اۆتور: تالعاتجان مۇحامەتبەك ۇلى