جەر كوميسسياسى: 1942-جىلعى قۇپيا كوورديناتتار جۇيەسىنەن باس تارتۋ قاجەت
جەر رەفورماسى جونىندەگى كوميسسيانىڭ ءۇشىنشى وتىرىسىندا وسىنداي ماسەلە كوتەرىلدى، دەپ حابارلايدى قازاقپارات ءتىلشىسى.
جەر رەفورماسى جونىندەگى كوميسسيانىڭ ەكونوميكالىق ماسەلەلەر جونىندەگى جۇمىس توبىنىڭ باسشىسى اقىلبەك كۇرىشبايەۆ جەر قاتىناستارىن سيفرلاندىرۋعا كەدەرگى كەلتىرىپ وتىرعان باستى توسقاۋىلدى اتادى.
«3 ماسەلە - 1942-جىلعى قۇپيا كوورديناتتار جۇيەسىن پايدالانۋدان ءبىرىڭعاي كوورديناتتار جۇيەسىنە اۋىسۋىمىز قاجەت. بۇل سۇراق جەر قاتىناستارىن سيفرلاندىرۋدىڭ نەگىزى بولىپ تابىلادى. قازىرگى تاڭدا ت م د مەملەكەتتەرىنىڭ ىشىنەن اتالعان 1942-جىلعى ەسكى كورديناتتار جۇيەسىندە تەك تۇرىكمەنستان مەن قازاقستان عانا قالعان. ياعني، بۇل ماسەلەدە ءبىز قاتتى قالىپ وتىرمىز. ۇسىنىس - جەر رەسۋرستارىن باسقارۋدا 1942-جىلعى قۇپيا كوورديناتتار جۇيەسىنەن ءبىرىڭعاي كوورديناتتار جۇيەسىن پايدالانۋعا تەزىرەك كوشۋ»، - دەدى جۇمىس توبىنىڭ باسشىسى.
اتالمىش شارادا اقىلبەك كۇرىشبايەۆ حالىققا جايىلىمدىق جەر بەرۋدە بيۋروكراتيا وتە كوپ ەكەنىن ايتقان بولاتىن. وسى اپتادا ءماجىلىس جەردى شەتەلدىكتەرگە بەرۋگە ءبىرجولا تىيىم سالۋدى كوزدەيتىن زاڭ جوباسىن ماقۇلدادى. پرەزيدەنتتىڭ كومەكشىسى ەرلان قارين وسى زاڭ جوباسىنىڭ ماقۇلدانۋى تۋرالى پىكىر بىلدىرگەنىن جازعان بولاتىنبىز.