باقتىباي ءجۇمادىلدين: 1917 -جىلى قازاق دالاسىندا 72 ميلليون باس مال بولعان
ۇلتتىق مۋزەيدە وتكەن «ۇلى دالانىڭ ۇلى تۇلعالارى» اتتى تاريحي- تانىمدىق دوڭگەلەك ۇستەل بارىسىندا تاريحشىلار ساياسي سۇرگىننىڭ قازاقتى اتتان ءتۇسىرىپ، مالىن قۇرتۋدان باستالعانىن ايتتى.
«كەيبىر دەرەكتەردە ⅩⅩ عاسىردىڭ باسىندا قازاق دالاسىندا 100 ميلليون باس مال بولعانىن ايتادى. سونىڭ سوڭىنا ءتۇسىپ، زەرتتەپ جاتقان ەشكىم جوق. ال 1917 -جىلعى ساناقتا قازاقتاردىڭ قولىندا 72 ميلليون باس مال بولعان. 1928 -جىلى ول 40 ميلليون باسقا ءتۇستى. ودان كەيىنگى 3 جىلدا الگى 40 ميلليون مالدان 4,5 ميلليون باس قالدى»، دەيدى تاريحشى جۋرناليست.
قازاق تانۋشى عالىم وقۋشىلارعا «باي» دەگەن ۇعىمنىڭ ءمانى مۇلدە بۇرمالانىپ كەتكەنىن دە ايتتى.
«باي» دەگەن ءسوزدىڭ تۇپكى ماعىناسى «ەر»، «قولىنان ءىس كەلەتىن ازامات» دەگەندى بىلدىرەدى. تۇرىكتەردىڭ مىرزانى «بەي» دەيتىنى سوعان دالەل. وسىنداي اياۋلى ۇعىمدى بولشيەۆيكتەر سانامىزعا تاپ رەتىندە تاڭىپ، «قاناۋشى» دەگەن ءمان ۇستەپ جىبەردى. سول بايلاردى قۋدالاپ، قۇرتۋ ارقىلى قازاقتى باسسىز قالدىردى»، - دەدى تاريحشى.