قازاقستاندا ءبىر دارىگەرگە 1900 ادامنان كەلەدى
«قازىرگى ۋاقىتتا 2019-2020-جىلدارعا ارنالعان العاشقى مەديتسينالىق-سانيتاريالىق كومەكتى دامىتۋ جوسپارى ىسكە اسىرىلىپ جاتىر. وسى جىلى 1300 دارىگەرلىك بولىمشە اشىلدى. ءار بولىمشەنىڭ جۇكتەمەسى - 1658 ادامنان كەلەدى. الايدا كادرلاردىڭ جۇمىستى قوسا اتقارۋى مەن تاپشىلىعىنا بايلانىستى 1 دارىگەرگە ءىس جۇزىندە بەكىتىلگەن حالىق سانى 1900 ادامدى قۇراپ وتىر»، - دەدى ەلجان ءبىرتانوۆ سەناتتا وتكەن ۇكىمەت ساعاتىندا.
ءمينيستردىڭ ايتۋىنشا، ج و و تۇلەكتەرىن جۇمىسقا تارتۋدىڭ ارقاسىندا بيىل العاشقى مەديتسينالىق كومەك دارىگەرلەرىنىڭ تاپشىلىعى 900 ادامعا ازايعان.
«سيفرلاندىرۋدىڭ ارقاسىندا ەمحانالارداعى كەزەك 30 پايىزعا تومەندەدى. شۇعىل سيپاتتان تىس شاقىرۋلار جەدەل جاردەم قىزمەتىنەن بولىمشە دارىگەرلەرىنە بەرىلگەننەن كەيىن جىل ىشىندە جەدەل جاردەم شاقىرۋلارى 25 پايىزعا تومەندەدى. اۋرۋلاردى باسقارۋ باعدارلامالارىنا 462 مىڭ ادام قاتىسىپ جاتىر. ناتيجەسىندە باعدارلاماعا قاتىساتىن اۋرۋلاردى ستاتسيونارلارعا ەمدەۋگە جاتقىزۋ 2,5 ەسەگە تومەندەدى»، - دەدى ول.
ەلجان ءبىرتانوۆ اتاپ وتكەندەي، 2022-جىلعا دەيىن مەملەكەتتىك-جەكەشەلىك ارىپتەستىكتى قوسا العاندا ەلىمىزدە 595 العاشقى مەديتسينالىق-سانيتاريالىق كومەك نىسانى سالىنىپ، جاڭارتىلادى. بۇل العاشقى كومەك نىساندارىن ۇلكەيتىپ، ولاردىڭ قولجەتىمدىلىگىن قامتاماسىز ەتۋگە مۇمكىندىك بەرەدى.