بيىل ەلوردادا الەۋمەتتىك وسال وتباسىلارعا 1900 پاتەر بەرىلەدى - باقىت سۇلتانوۆ

None
None
نۇر- سۇلتان. قازاقپارات - بۇگىن نۇر- سۇلتان قالاسىنىڭ اكىمى باقىت سۇلتانوۆ جانە ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ەلوردانىڭ از قامتىلعان جانە كوپبالالى وتباسىلارىمەن كەزدەستى، دەپ حابارلايدى قازاقپارات ءتىلشىسى.

 «از قامتىلعان جانە كوپ بالالى وتباسىلاردى تولعاندىراتىن باستى ماسەلەلەردىڭ ءبىرى - تۇرعىن ءۇي. بۇگىندە باس قالادا 45 مىڭ ادام تۇرعىن ءۇي كەزەگىندە تۇر، ونىڭ 20 مىڭى از قامتىلعان، كوپبالالى جانە مۇگەدەك مۇشەسى بار وتباسىلار. جانە 22 مىڭى مەملەكەتتىك جانە بيۋدجەت قىزمەتكەرلەرى. قازىرگى ۋاقىتتا وسى تىزىمدەگىلەردىڭ 188-ىنە پاتەر بەرىلدى، جالپى جوسپار بويىنشا بيىل 781 پاتەر بەرىلۋى ءتيىس، ءبىراق بۇدان بولەك جىل سوڭىنا دەيىن الەۋمەتتىك جاعىنان وسال توپقا جاتاتىن وتباسىلارعا قوسىمشا قارجىلاندىرۋ ەسەبىنەن تاعى  1800- 1900 پاتەر بەرىلەدى»، - دەدى باقىت سۇلتانوۆ.

قالا باسشىسىنىڭ ايتۋىنشا، اتالعان ماقساتقا بيۋدجەتتەن 1,3 تريلليون تەڭگە قاجەت.

 «تۇرعىن ۇيدەن بولەك بۇگىندە بيۋدجەتتەن 8 ميلليارد تەڭگە قارجى ءبولىنىپ، ول 13 ءتۇرلى الەۋمەتتىك شارالارعا جۇمسالۋدا. مىسالى، مۇگەدەكتەر مەن ولاردىڭ اسىراۋشىلارىنىڭ قوعامدىق كولىكتەردە تەگىن ءجۇرۋى ەنگىزىلۋدە، ودان بولەك كوپبالالى جانە از قامتىلعان وتباسىلاردان شىققان 1-11- سىنىپ وقۋشىلارى وسى جىلدىڭ 1 - قىركۇيەگىنەن باستاپ مەكتەپتە تەگىن ىستىق تاماقپەن قامتىلادى. بىزدە بۇعان دەيىن تەك قانا باستاۋىش سىنىپ وقۋشىلارى تەگىن تاماقپەن قامتاماسىز ەتىلگەن. سول سياقتى اتالعان ساناتقا جاتاتىن وتباسىنىڭ بالالارىنا جازعى ۋاقىتتا دەمالىس ۇيىمداستىرىلادى. اتاپ ايتقاندا، وسى جازدا ەلوردانىڭ 10 مىڭ بۇلدىرشىنىنە جازعى دەمالىس ورىندارىنا جولداما بەرىلەدى، بۇل ماقساتتا 500 ميلليون تەڭگە قارجى ءبولۋ قاراستىرىلۋدا»، - دەدى ول.

 سونداي- اق، ب. سۇلتانوۆ از قامتىلعان جانە كوپ بالالى وتباسىدان شىققان وقۋشىلاردى مەكتەپ فورماسىمەن قامتاماسىز ەتۋ ماقساتىندا بيۋدجەتتەن 638 ميلليون تەڭگە جانە وسى ساناتقا جاتاتىن وتباسىدان شىققان بۇلدىرشىندەردى بالاباقشامەن قامتۋ ماقساتىندا 513 ميلليون تەڭگە قارجى بولىنەتىنىن ايتىپ ءوتتى.

اۆتور: داۋلەت ىزتىلەۋ

null

سوڭعى جاڭالىقتار