ەلوردادا الاياق ايەل 19 ادامدى الداپ، 3,5 ميلليون تەڭگەسىن الىپ كەتكەن

نۇر-سۇلتان. قازاقپارات - ەلوردا پوليتسەيلەرى اقشاڭدى كوبەيتىپ بەرەم دەگەن جەلەۋمەن 19 ادامدى الداپ سوققان 22 جاستاعى الاياق ايەلدى ۇستادى، دەپ حابارلايدى قازاقپارات نۇر-سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنە سىلتەمە جاساپ.

ول ءوزىنىڭ جىمىسقى ويىن جۇزەگە اسىرۋ ءۇشىن WhatsApp مەسسەندجەرىندە توپ اشىپ، ادامداردى سپورتتىق شارالارعا اقشا تىگۋدەن پايدا تابۋ بويىنشا قىزمەتىن ۇسىنعان.

ادامداردىڭ سەنىمىنە كىرۋ ءۇشىن، توپتا فەيك چەكتەر مەن ۇتىس تۇبىرتەكتەرىن جاريالاعان.

ايەل تاۋلىك ىشىندە 100 پايىز پايدا ۇتىسقا يە بولۋدى ۋادە ەتىپ، وسى ۇسىنىسىنا قىزىققانداردى ەلەكتروندىق ءاميانعا اقشا اۋدارۋعا كوندىرگەن.

اڭقاۋ ازاماتتار ەلەكتروندىق ءاميانعا 100 مىڭنان 300 مىڭعا دەيىن اقشا اۋداردى. قاسكۇنەم اقشانى اۋدارتىپ العان سوڭ جابىرلەنۋشىلەردىڭ نومىرلەرىن بۇعاتتاپ وتىردى. تەرگەۋ بارىسىندا كۇدىكتىنىڭ سپورتقا اقشا تىگۋگە ەش قاتىسى بولماعانى، اقشانى ءوز قالاۋىمەن جۇمساعانى انىقتالدى.

اتالعان ءىس بويىنشا ق ر قىلمىستىق كودەكسىنىڭ 190-بابىنىڭ 3-بولىمىمەن قىلمىستىق ءىس قوزعالدى.

قازىرگى كەزدە ۇستالعان ايەل 19 ەپيزودقا قاتىسى بار دەگەن كۇدىككە ءىلىندى، الايدا ونىڭ قولىنان جابىرلەنگەندەر بۇدان دا كوپ بولۋى ابدەن مۇمكىن.

كەلتىرىلگەن شىعىننىڭ جالپى سوماسى 3500000 تەڭگەنى قۇراعان. پاندەميا كەزەڭىندە ينتەرنەتتە اقشانى كوبەيتۋ بويىنشا قىزىقتىراتىن ۇسىنىستار سانى كوبەيە ءتۇستى.

نۇر-سۇلتان قالاسىنىڭ پوليتسيا دەپارتامەنتى ازاماتتاردى ساق بولىپ، جەلىدەگى الاياقتاردىڭ ايلاسىنا الدانباۋعا، ينتەرنەت جەلىسىندە تابىسىن كوبەيتۋ بويىنشا سەنىمسىز اكسيالارعا قاتىسپاۋ كەرەكتىگىن ەسكەرتەدى.