قازاقستاندىقتاردىڭ 18 ميلليارد تەڭگەسىن جىمقىرعان شەتەلدىك قىلمىستىق توپ ۇستالدى

قاراعاندى. قازاقپارات - قازاقستان پوليتسەيلەرى 5-6 جىل بويى ينتەرنەت-الاياقتىقپەن اينالىسىپ كەلگەن ۇيىمداسقان قىلمىستىق توپتىڭ جولىن كەستى.

ولار ەل تۇرعىندارىن 18 ميلليارد تەڭگەگە شىعىنعا وتىرعىزعان.

بۇل تۋرالى ىشكى ىستەر ءمينيسترى مارات احمەتجانوۆ تەمىرتاۋ قالاسىنداعى حالىقپەن كەزدەسۋى بارىسىندا مالىمدەدى، دەپ حابارلايدى قازاقپارات ءتىلشىسى.

ق ر ءى ءى م باسشىسى حابارلاعانداي، قىلمىستىق توپتىڭ ۇيىم ۋكراينادا ورنالاسقان. ولار ءتۇرلى تاسىلدەر بويىنشا، «جۇمىس» ىستەگەن. نەگىزىنەن قازاقستان ازاماتتارىنا وزدەرىن پوليتسيا نەمەسە بانك قىزمەتكەرىمىز دەپ تانىستىرىپ، ولاردى الداپ-ارباپ، اقشالارىن قاجەتتى جەرگە اۋدارىپ وتىرعان. 5-6 جىل ىشىندە قىلمىستىق توپ ەل تۇرعىندارىن 18 ميلليارد تەڭگەگە شىعىنعا وتىرعىزعان.

«كورشى مەملەكەتتەگى ارىپتەستەرىمىزبەن كەلىسىم جاسالدى. مەن ۆەدومستۆو باسشىسىمەن، ياعني سول ەلدىڭ ىشكى ىستەر مينيسترىمەن تىكەلەي بايلانىستا بولدىم. بىرلەسكەن وپەراتسيا ۇيىمداستىرىلىپ، ءبىزدىڭ پوليتسەيلەر سول ەلگە ءىسساپارعا جىبەرىلدى. ءسويتىپ، 5-6 جىل كولەمىندە قىلمىستىق توپتىڭ ارەكەتى اشكەرەلەندى»، - دەدى ىشكى ىستەر ءمينيسترى مارات احمەتجانوۆ.

ونىڭ سوزىنشە، بۇل توپ تەك جىمىسقى ارەكەتىن تەك قازاقستانمەن جۇزەگە اسىرىپ كەلگەن. توپ مۇشەلەرىن ۇستاۋ كەزىندە كوپتەگەن قۇرىلعىلار تاركىلەندى. ولاردىڭ ءار جەردەن ارەكەت ەتەتىن 41 ورنى بولعان. ياعني، وسىنشاما وپەراتور قازاقستان ازاماتتارىنىڭ دەرەكتەرىن وڭدەپ وتىرۋ ءۇشىن ءۇش اۋىسىممەن جۇمىس ىستەگەن.

«قابىلدانعان شارالاردىڭ ارقاسىندا توپ جويىلدى. ءبىز انىقتاعان مەكەنجايدان سوڭعى 5 كۇندە قازاقستانعا قوڭىراۋلار تۇسكەن جوق. سونىمەن قاتار، قابىلدانعان باسقا ءىس-شارالاردىڭ ارقاسىندا 5,5 ميلليون تەلەفون قوڭىراۋلارى بۇعاتتالدى، ولار ءبىزدىڭ ازاماتتارعا الاياقتىق ارەكەتتەرى بويىنشا ۇسىنىس جاساۋ كەرەك ەدى. قازىرگى ۋاقىتتا قازاقستان اۋماعىندا وتىرىپ قارجى اۋدارعان دروپپەرلەردىڭ وسى ىسكە قاتىستىلىعى انىقتالۋدا»، - دەپ تولىقتىردى ءى ءى م باسشىسى.

بەلگىلى بولعانداي، وسى جىلى تىركەلگەن 140 مىڭ قىلمىستىڭ %30 ينتەرنەت-الاياقتىققا تيەسىلى. سوندىقتان پوليتسيا بۇل باعىتتا قارقىندى جۇمىس ىستەپ جاتىر. بىرنەشە ايدىڭ ىشىندە ينتەرنەت جەلىسى ارقىلى اقشا بوپسالاعان 5 قىلمىستىق توپ انىقتالدى جانە جويىلدى.