جامبىل وبلىسىندا سەل قاۋپىن توندىرەتىن 18 وزەن بار
داۋرىعۋعا نەگىز جوق، ءبىراق ولار 5466 تۇرعىن مەن 1664 نىسان ءۇشىن قاۋىپتى سانالادى، دەپ حابارلايدى قازاقپارات ءتىلشىسى.
بۇل تۋرالى وڭىرلىك كوممۋنيكاتسيالار قىزمەتى الاڭىندا ق ر ت ج م «قاز سەلدەن قورعاۋ» م م «جامبىل اۋماقتىق پايدالانۋ باسقارماسى» فيليالىنىڭ باسشىسى سۇلتان اقبەرديەۆ ايتتى. سونداي-اق، سپيكەرلەر قاتارىندا ت ج د ازاماتتىق قورعانىس باسقارماسىنىڭ باسشىسى رۋسلان شاريەۆ پەن مەملەكەتتىك ءورت باقىلاۋ باسقارماسى باسشىسىنىڭ مىندەتىن اتقارۋشى ماديار جاتقانبايەۆ تا بولىپ، ءوز سالالارى بويىنشا وزەكتى تاقىرىپقا توقتالدى.
ايتا كەتەيىك، اتالعان وزەندەرگە توقتالاتىن بولساق، جۋالى اۋدانىنداعى اقساي، كوكساي وزەندەرى اۋماعىندا 6 قاۋىپتى تەلىم بولسا، ت. رىسقۇلوۆ اۋدانىنداعى ماقپال، شونگەر، قاراقات، قاراقىستاق، شالسۋ جانە كوكدونەن وزەندەرىنىڭ جاعالاۋىندا 39 قاۋىپتى تەلىم بار. ال، مەركى اۋدانىنداعى اسپارا، مەركى، مولالى، تالدى بۇلاق، ءتۇزۋ سۇرات وزەندەرىندە 63، قورداي اۋدانىنداعى قاراقوڭىز، قاقپاتاس جانە قالعۇتى وزەندەرىندە 28، تالاس اۋدانىنداعى تامدى وزەنىندە 4 قاۋىپتى تەلىم ورنالاسقان.
«فيليالىمىزدىڭ 6 تۇراقتى بەكەتى گيدرومەتەورولوگيالىق جاعدايعا باقىلاۋ جاساپ وتىر. سەل قاۋپى اسەر ەتەتىن اۋماق حالقىن جانە اۋماعىن سەل اعىندارىنان قورعاۋ ماقساتىندا ءىس-شارالار جوسپارى بەكىتىلىپ، جەدەل شتاب قۇرامى جاساقتالدى. ول ايماقتاردا پروفيلاكتيكالىق شارالار بارىسىندا تۇرعىندارمەن ءتۇسىندىرۋ جۇمىستارى جۇرگىزىلدى.
سونىمەن قاتار «ساق بولىڭىز سەل!» اتتى بارلىعى 476 دانا جادناما تاراتىلدى. اۋداندار مەن اۋىلدىق وكرۋگتەردىڭ اكىمدەرىنە، ۇيىمدار، كاسىپورىندار باسشىلارىنا، اسكەري بولىمدەر باستىقتارىنا، اۋماقتارىنداعى سەل قاۋپى بار شارۋاقوجالىق باسشىلارىنا 53 دانا ەسكەرتپە-ۇسىنىس بەرىلدى. بەرىلگەن ەسكەرتپە-ۇسىنىستاردىڭ ورىندالۋى جەرگىلىكتى اتقارۋشى ورگانداردىڭ باقىلاۋىندا بولادى. بۇدان باسقا، قاۋىپتى وزەن الاپتارىندا 14 دانا «ساق بولىڭىز، سەل» ەسكەرتۋ قالقانى قويىلعان»، - دەدى س. اقبەرديەۆ.