قازاقستان چەمپيوناتى: 18 جاستاعى بوكسشى ازيا چەمپيونىن ۇتىپ كەتتى

نۇر- سۇلتان. قازاقپارات - شىمكەنت قالاسىندا بوكستان ەرلەر اراسىندا قازاقستان چەمپيوناتىنىڭ فينالدىق باسەكەسى وتۋدە، دەپ حابارلايدى قازاقپارات ءتىلشىسى.

اسا جەڭىل، 49 ك گ سالماقتا اقمولالىق تەمىرتاس ءجۇسىپوۆ پەن باتىس قازاقستاندىق دانيال ءسابيت شارشى الاڭعا شىقتى. ازيا چەمپيونى، باسقا دا اتاقتارى جەتەرلىك ت. ءجۇسىپوۆ 32-دە بولسا، 18 جاستاعى د. ءسابيت فينالعا شىققان سپورتشىلاردىڭ ەڭ جاسى ەدى. بۇل باسەكەدە تورەشىلەردىڭ ءبىراۋىزدان شەشىمىمەن جەڭىسكە جەتكەن دانيال ءسابيت قازاقستان چەمپيونى اتاندى.

تاعى ءبىر جاس بوكسشى، شىمكەنتتىك ماحمۇد سابىرحان 52 ك گ سالماقتا وليمپيادا جولداماسىنىڭ يەگەرى، تۇركىستاندىق ساكەن بيبوسىنوۆتى ۇتىپ كەتتى. ەرلەر اراسىندا فينالدىق جەكپە- جەكتەر ودان ءارى جالعاسۋدا.

ەسكە سالا كەتەيىك، ۆالەنتينا حالزوۆا وليمپيادا جۇلدەگەرىن ۇتقانىن، ايەلدەر اراسىندا بارلىق چەمپيوندار انىقتالعانىن جازعان بولاتىنبىز.

اۆتور: ەلجان ەرالى