كوروناۆيرۋس ينفەكتسياسىنىڭ تىركەلۋ جاعدايلارى 18 پايىزعا تومەندەدى - الەكسەي سوي
بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي سوي ايتتى، دەپ حابارلايدى قازاقپارات ءتىلشىسى.
«3- تامىزدا 93820 ناۋقاس تىركەلىپ، ونىڭ 27 597 ءسى ەم الىپ جاتىر. 55132 ادام ەمدەلىپ شىعىپ، 1091 ادام قايتىس بولدى. تولىقتاي العاندا، رەسپۋبليكا بويىنشا وتكەن اپتامەن سالىستىرعاندا تىركەلگەن جاعدايلاردىڭ 18 پايىزعا تومەندەگەنى بايقالادى. 4 اپتالىق كارانتين كەزىندە مىناداي ناتيجەگە قول جەتكىزىلدى: توسەك-ورىننىڭ بوساۋى 55 پايىز بولدى. ونىڭ ىشىندە رەانيماتسيالىق توسەك-ورىندار 36 پايىزعا قىسقاردى. جازىلىپ شىققاندار سانى 69,4 پايىزعا جەتتى. جەدەل جاردەم شاقىرۋ، ونىڭ ىشىندە كوروناۆيرۋسقا بايلانىستى شاقىرتۋلار 40 پايىزعا ازايدى»، - دەدى ول.
ءمينيستردىڭ ايتۋىنشا، ۆيرۋستىڭ رەپرودۋكتيۆتىك كورسەتكىشى 24 پايىزعا، ياعني، 1,2 دەن 0,89 عا دەيىن تومەندەدى.
«وسىلايشا، دەنساۋلىق ساقتاۋ جۇيەسىنە جۇكتەمەنىڭ نەگىزگى كورسەتكىشتەرىن تومەندەتۋگە قول جەتكىزىلدى. قاتاڭ شەكتەۋ شارالارىن ەنگىزگەنگە دەيىن رەپرودۋكتيۆتىك كورسەتكىشى 1,2 پايىز بولعان ەدى. كارانتين ەنگىزىلگەن سوڭ 2 اپتادان كەيىن رەپرودۋكتيۆتىك كورسەتكىشتىڭ تۇراقتى تۇردە تومەندەۋ ءۇردىسىن بايقاپ وتىرمىز»، - دەدى الەكسەي سوي.
ونىڭ دەرەگىنشە، 23- شىلدەدەن باستاپ ينفەكتسيانىڭ رەپرودۋكتىك كورسەتكىشى تۇراقتى تۇردە تومەندەپ كەلە جاتىر. بۇل كورسەتكىش 4- تامىزدا 0,89 عا دەيىن قىسقاردى.
«ەپيدەميولوگيالىق تۇرعىدان العاندا بۇل كورسەتكىشتىڭ 1 دەن تومەن بولعانى ماڭىزدى. 4- تامىزدا رەپرودۋكتيۆتىك كورسەتكىش اقمولا مەن قاراعاندى وبلىستارىنان باسقا بارلىق وڭىردە 1 دەن جوعارى بولعان جوق»، - دەدى ول.