الەمدە كوروناۆيرۋس جۇقتىرعاندار سانى 18 ميلليوننان استى
690 مىڭعا جۋىق پاتسيەنت كوز جۇمعان. 10,7 ميلليون ناۋقاس جازىلىپ شىققان. وتكەن تاۋلىكتە اۋرۋ جۇقتىرۋدىڭ 228,7 مىڭ جاڭا جاعدايى انىقتالدى، دەپ حابارلايدى قازاقپارات BBC اگەنتتىگىنە سىلتەمە جاساپ.
دۇنيەجۇزىلىك دەنساۋلىق ساقتاۋ ۇيىمى كوپتەن كۇتكەن Covid-19 ۆيرۋسىنا قارسى ۆاكتسينا پاناتسەيا بولماۋى مۇمكىن دەپ مالىمدەدى.
«قازىرگى ۋاقىتتا جاعدايدى رەتتەيتىن «سيقىرلى تاياقشا» جوق، ول ەشقاشان بولماۋى دا مۇمكىن»، - دەدى د د ۇ باسشىسى تەدروس ادانوم گەبرەيسۋس.
ىندەتكە شالدىققاندار سانى جونىنەن اقش كوش باستاپ تۇر. مۇندا 4,6 ميلليون ادام اۋرۋ جۇقتىرعان. ەكىنشى ورىندا برازيليا (2,7 ميلليون)، ءۇشىنشى ورىندا ءۇندىستان (1,8 ميلليون)، ءتورتىنشى ورىندا رەسەي (854,6 مىڭ) تۇر.
اۆستراليادا دۇكەندەر جابىلۋدا. كوروناۆيرۋس جۇقتىرۋدىڭ جاڭا جاعدايلارى كوبەيىپ بارا جاتقان اۆستراليانىڭ ۆيكتوريا شتاتى كارانتين شارالارىن كۇشەيتتى. مەلبۋرندە التى اپتاعا دۇكەندەر جابىلادى. وسى ۋاقىتقا دەيىن اۆستراليا ينفەكتسيانىڭ تارالۋىمەن جاقسى كۇرەسە ءبىلدى. ءبىراق سوڭعى اي بويى مەلبۋرندەگى جاعداي ناشارلاي باستادى. ەلدە تىركەلگەن 18,3 مىڭ ناۋقاستىڭ جارتىسىنان كوبىسى ۆيكتوريا شتاتىنا تيەسىلى.
اۆستراليادا Covid-19 ۆيرۋسىنان 215 ادام قايتىس بولعان. مانچەستەردە توتەنشە جاعداي جاريالاندى. مانچەستەر مەن وعان ىرگەلەس اۋدانداردىڭ بيلىگى كوروناۆيرۋس جۇقتىرۋ وقيعالارىنىڭ ءوسىمىن توتەنشە جاعداي دەپ اتادى. ءبىراق قالا اكىمشىلىگى بۇل حابارلاما جەرگىلىكتى تۇرعىنداردى الاڭداتپاۋى كەرەك دەپ مالىمدەدى.
ويتكەنى بۇل جاعداي بارلىق مەملەكەتتىك قىزمەتتەردى ينفەكتسيامەن كۇرەسۋ ءۇشىن قوسىمشا رەسۋرستار تارتۋعا قاجەت. بۇعان دەيىن بيلىك ۇلكەن مانچەستەردە، لانكاشيردىڭ كەيبىر بولىكتەرىندە جانە باتىس يوركشيردە كارانتين شارالارىن قايتا ەنگىزدى.
بريتانيا - ەۋروپا ەلدەرىندەگى Covid-19 ۆيرۋسىنان قاتتى زارداپ شەككەن ەلدەردىڭ ءبىرى. مۇندا بارلىعى 306 مىڭ ادام ىندەتكە شالدىقسا، 42,6 مىڭ ناۋقاس قاۋىپتى ۆيرۋستان كوز جۇمعان.
سوڭعى ەكى ايدا ينفەكتسيانىڭ تارالۋى ازايۋدا. ءبىراق ۆيرۋس ەلدىڭ ايماقتارىندا ءورشىپ بارادى.
گەرمانياعا Covid-19-عا قاتىستى قولايسىز جاعدايى بار مەملەكەتتەردەن كەلگەندەردىڭ بارلىعى كوروناۆيرۋسقا تەست تاپسىرۋى مىندەتتى، دەپ حابارلادى ەلدىڭ دەنساۋلىق ساقتاۋ مينيسترلىگى.
گەرمانياداعى كوروناۆيرۋسقا بايلانىستى احۋال جاقسى بولاتىن. ءبىراق سوڭعى كۇندەرى كوروناۆيرۋس جۇقتىرۋشىلار سانى ارتا باستادى. ءبىر تاۋلىكتە 509 ادام ۆيرۋس جۇقتىردى. Covid-19 جۇقتىرعان جاعدايلاردىڭ جالپى سانى 210 مىڭنان اسادى.
ىندەت تاراي باستاعالى 9148 ادام كوز جۇمعان. نورۆەگيالىق «رۋال امۋندسەن» كرۋيزدىك كەمەسىندە كەم دەگەندە 40 جولاۋشى كوروناۆيرۋس جۇقتىردى. بورتتاعى تاعى بىرنەشە ءجۇز ادام كارانتيندە جاتىر جانە تەست ناتيجەلەرىن كۇتۋدە.
نورۆەگيالىق Hurtigruten كومپانياسىنا تيەسىلى كەمە جۇمادان باستاپ نورۆەگيانىڭ سولتۇستىگىندەگى ترومسە پورتىنا توقتادى. كومپانيا بارلىق كرۋيزدەرى توقتاتىلعانىن حابارلادى.
«قازىر ءبىز بارلىق مۇمكىندىكتى جانە رەسۋرستارىمىزدى قوناقتارىمىز بەن ارىپتەستەرىمىزگە كومەكتەسۋگە جۇمىلدىرامىز»، - دەدى Hurtigruten باسشىسى.
فيليپپيندە قاتاڭ كارانتين شارالارى قايتا ەنگىزىلدى. مانيلا مەن ونىڭ ماڭىنداعى قالالاردا شەكتەۋ ەنگىزىلدى. ەل پرەزيدەنتى رودريگو دۋتەرتە بۇل شەشىمگە كەلۋگە دارىگەرلەردىڭ سوزدەرى اسەر ەتكەنىن ءتۇسىندىردى. ولار ەلدىڭ ۆيرۋسپەن كۇرەستە ءالسىز ەكەنىن ەسكەرتكەن جانە دەنساۋلىق ساقتاۋ جۇيەسى اۋرۋ جۇقتىرعاندار سانىنىڭ وسۋىنە توتەپ بەرمە الماۋى مۇمكىن دەگەن قاۋىپ بارىن ايتقان.
11- تامىزدان باستاپ سينگاپۋردا مىندەتتى وقشاۋلانعان ادامدار ارنايى قۇرىلعىلاردىڭ كومەگىمەن باقىلانادى. بۇل ءۇي كارانتينىنە جىبەرىلگەن ادامدارعا قاتىستى. قۇرىلعىلار GPS ترەكەرلەردىڭ كومەگىمەن ادامداردىڭ ورنالاسقان جەرىن باقىلايدى.
سينگاپۋردە كارانتين شارالارىن بۇزعاندار قاتاڭ جازالانادى: قۇرىلعىنى الىپ تاستاعان نەمەسە ءوزىن-ءوزى وقشاۋلاۋ ەرەجەسىن بۇزعان ادامعا ءىرى مولشەردە ايىپپۇل سالىنادى نەمەسە التى ايعا تۇرمەگە قامالادى.