الەمدە كوروناۆيرۋس جۇقتىرعاندار سانى 18 ميلليونعا جۋىقتادى

None
None
لوندون. قازاقپارات - دجونس حوپكينس ينستيتۋتىنىڭ مالىمەتى بويىنشا الەم بويىنشا Covid-19 ىندەتىن جۇقتىرعانداردىڭ جالپى سانى 18 ميلليونعا جۋىقتادى، 685 مىڭنان استام ادام ءولىمى تىركەلگەن.

ىندەت بىرنەشە ەلدە بەلسەندى تۇردە تارالىپ جاتىر. ولاردىڭ قاتارىندا اۆستراليا، ا ق ش، وڭتۇستىك افريكا مەن ءۇندىستان بار، دەپ حابارلايدى قازاقپارات BBC اگەنتتىگىنە سىلتەمە جاساپ.

اۆستراليانىڭ ۆيكتوريا شتاتىندا ينفەكتسياعا شالدىققاندار ستاتيستيكاسى كۇرت ارتىپ، اياسىندا اپات رەجيمى جاريالاندى.

مۇندا سوڭعى تاۋلىكتە 671 ادامنىڭ اۋرۋ جۇقتىرعانى راستالدى. شتاتتىڭ استاناسى مەلبۋرندە 4- دەڭگەيدەگى ساقتىق شارالارى ەنگىزىلدى. اتالعان شەكتەۋ شاراسىنا سايكەس، تۇرعىندارعا تۇراتىن جەرىنەن 5 شاقىرىم راديۋستا ازىق-تۇلىك الۋ نەمەسە سپورتپەن شۇعىلدانۋ ءۇشىن عانا ۇيدەن شىعۋعا رۇقسات ەتىلەدى. بۇل شەكتەۋلەر كەم دەگەندە 6 اپتاعا سوزىلادى.

رەسەيدە جەكسەنبى كۇنى ۆيرۋس جۇقتىرۋدىڭ 5427 جاڭا جاعدايى تىركەلدى. ىندەت تاراعالى 850 مىڭنان استام ادام اۋرۋعا شالدىققان. رەسەي اۋرۋ جۇقتىرعاندار سانى بويىنشا الەمدە ءتورتىنشى ورىندا تۇر.

لاتىن امەريكاسى مەن كاريب باسسەينى ەلدەرىندە Covid-19 ۆيرۋسىنان 200 مىڭنان استام ادام كوز جۇمعان. ولاردىڭ باسىم كوپشىلىگى، شامامەن %75 برازيليا مەن مەكسيكادان.

وڭتۇستىك افريكادا 500 مىڭنان استام ادام ىندەتكە شالدىققان.

ءۇندىستاندا ءۇشىنشى كۇن قاتارىنان اۋرۋ جۇقتىرعاندار سانى 50 مىڭنان استى.

ا ق ش- تا دونالد ترامپ رەسمي تۇردە پرەزيدەنتتىككە ۇمىتكەر دەپ جاريالانۋى ءتيىس رەسپۋبليكالىقتاردىڭ سايلاۋالدى سەزى كوروناۆيرۋسقا بايلانىستى تاريحتا العاش رەت جۋرناليستەر ءۇشىن جابىق رەجيمدە وتەتىنىن ءمالىم ەتتى.

ول 24- تامىزدا سولتۇستىك كارولينا شتاتىنىڭ شارلوتت قالاسىندا 336 دەلەگاتتىڭ قاتىسۋىمەن وتەدى.

يراندا وتكەن تاۋلىكتە اۋرۋ جۇقتىرعان 2685 ناۋقاس انىقتالدى. بۇل - ءبىر اي ىشىندەگى ەڭ جوعارى ءوسىم كورسەتكىشى.

سوڭعى جاڭالىقتار