پەتروپاۆلدا 18 جاستاعى بويجەتكەن ەسىرتكىمەن ۇستالدى
سولتۇستىك قازاقستان وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلدىق بويجەتكەننەن پوليتسەيلەر 40 گرامعا جۋىق مەفەدرون سينتەتيكالىق ەسىرتكى تاركىلەدى. اسەرى كۇشتى ءارى اسا قاۋىپتى ەسىرتكىنىڭ بۇل ءتۇرى سولتۇستىك قازاقستان وبلىسىندا العاش رەت انىقتالىپ وتىر.
«سوتقا دەيىنگى تەرگەپ-تەكسەرۋ بارىسىندا جەدەل ءىس-شارالار، ونىڭ ىشىندە كۇدىكتىنىڭ تۇرعىلىقتى جەرى بويىنشا ءتىنتۋ جۇرگىزىلدى. پاتەردە ەسىرتكىگە ۇقساس زات سالىنعان تۇيىنشەك تابىلدى. جۇرگىزىلگەن سوت-حيميالىق ساراپتاما زاتتىڭ مەفەدرون ەكەنىن راستادى»، - دەدى س ق و پوليتسيا دەپارتامەنتى ەسىرتكى قىلمىسىنا قارسى ءىس-قيمىل باسقارماسىنىڭ باستىعى جاندوس باسىبايەۆ.
سونداي-اق، پوليتسەيلەر پاتەردەن بۋىپ-تۇيەتىن ماتەريالداردى، نوۋتبۋكتاردى، تارازىنى جانە باسقا دا ەسىرتكى كاسىبىن راستايتىن زاتتاردى تاپتى.
ءتارتىپ ساقشىلارىنىڭ ايتۋىنشا، سوتقا دەيىنگى تەرگەۋ ماتەريالدارىنان كۇدىكتىنىڭ بىرنەشە اي بويى ينتەرنەت-دۇكەن ارقىلى ەسىرتكى ساتىپ الىپ، اسا قاۋىپتى زاتتى ساۋدالاعانى انىقتالعان.
قازىرگى ۋاقىتتا سوت ساراپتاماسى تاعايىندالدى.