الماتىدا 18- مامىردان باستاپ قانداي ۇيىمدار جۇمىس ىستەيدى؟
قالالىق اكىمدىكتىڭ حابارلاۋىنشا، بۇل تاعى 34,2 مىڭ ادامدى جۇمىسپەن قامتۋعا مۇمكىندىك بەرەدى. دەگەنمەن، قالادا كارانتيندىك شارالار ءالى دە جالعاسۋدا.
«تۋروپەراتورلاردىڭ، ۇيالى بايلانىستىڭ ابونەنتتىك بولىمشەلەرىنىڭ جانە قارجى سەكتورى كومپانيالارىنىڭ جۇمىسى كەلەسى الگوريتم بويىنشا جۇزەگە اسادى: ەڭ الدىمەن، الماتى قالاسىنىڭ باس مەملەكەتتىك سانيتارلىق دارىگەرىنىڭ قاۋلىسىنىڭ ەرەجەلەرىمەن تانىسۋ كەرەك. سوسىن مىندەتتى الەۋمەتتىك قاشىقتىق، جۇمىس ورىندارىنداعى قاتاڭ سانيتارلىق رەجيم سياقتى ەرەجە تالاپتارىنا سايكەس نىساندى دايىنداۋعا مىندەتتەلەدى. دايىندىق جۇمىستارى ءساتتى اياقتالعاننان كەيىن infoalmaty.kz سايتىندا تىركەلىپ، نىساننىڭ ەرەجەلەردىڭ تالاپتارىنا سايكەس دايىندالعانىن راستاپ، ەلەكتروندى سيفرلىق قولتاڭبامەن حابارلاماعا قول قويۋ ارقىلى كاسىپورىندا جازىلعان نورمالاردىڭ ساقتالۋىنا كەپىلدىك بەرەدى. تىكەلەي جۇمىس ورنىندا قاجەت قىزمەتكەرلەر سانىن وسى ۇيىمداردىڭ جەتەكشىلەرى دەربەس انىقتايدى»، - دەدى قالالىق كاسىپكەرلىك جانە ينۆەستيتسيالار باسقارماسىنان.
ەستەرىڭىزگە سالا كەتسەك، بۇعان دەيىن الماتىدا اۋديت وتكەن جاعدايدا جەكە تۇرعان سۇلۋلىق سالوندارى مەن ءبىلىم بەرۋ ورتالىقتارى، ونەركاسىپ جانە قۇرىلىس سالاسىنداعى وبەكتىلەر، جوبالاۋ ۇيىمدارى، سونداي-اق ۇيگە جەتكىزۋ قىزمەتى، ت ج و، شينومونتاج، كولىك جۋۋ جانە اۆتوسالوندار، ۇيىمداستىرۋ تەحنيكاسىن جوندەۋ جانە جارناما اگەنتتىكتەرى جۇمىسىنان شەكتەۋ الىنىپ تاستالعان بولاتىن.
كولىك جانە قويما، اقپارات جانە بايلانىس، قارجى قىزمەتتەرى (%50 - ەكىنشى دەڭگەيلى بانكتەر، ميكروقارجى ۇيىمدارى، ساقتاندىرۋ كومپانيالارى، بروكەرلەر، لومباردتار، ايىرباستاۋ پۋنكتتەرى)، بيزنەسكە ارنالعان كاسىبي قىزمەتتەر، فوتوسالوندار مەن گۇل پاۆيلوندارى، شاشتارازدار، جىلجىمايتىن مۇلىك بويىنشا جاسالاتىن وپەراتسيالار جونىندەگى كومپانيالار، باسپا قىزمەتى، اياق كيىم جوندەۋ جانە حيميالىق تازالاۋ، كىر جۋۋ، 500 شارشى مەترگە دەيىن ازىق-تۇلىكتىك ەمەس دۇكەندەر اۋديتسىز، سانيتارلىق-ەپيدەميولوگيالىق تالاپتاردى ورىنداپ قانا جۇمىسىن باستاپ كەتكەن بولاتىن.