نۇر-سۇلتاندا 18 كولىك سوقتىعىستى

نۇر-سۇلتان. قازاقپارات - اۋا رايىنىڭ قولايسىزدىعىنان ەلوردادا جول- كولىك وقيعالارىنىڭ سانى ارتتى، دەپ حابارلايدى قازاقپارات نۇر-سۇلتان قالاسىنىڭ پوليتسيا دەپارتامەنتىنە سىلتەمە جاساپ.

«بۇگىن تاڭەرتەڭ جول- كولىك وقيعالارىنىڭ سانى ارتتى. قوسشى تاس جولىندا 18 كولىك سوقتىعىسقان 4 اپات جانە «مەترو» مەن «كەڭمارت» گيپەرماركەتتەرىنىڭ اراسىندا 8 كولىك زاقىمدالعان 3 وقيعا بولدى. وقيعا ورنىندا پوليتسيا قىزمەتكەرلەرى جۇمىس ىستەپ جاتىر.

بۇگىن 27-اقپاندا ساعات 10:04 تە قاراعاندى تاس جولىندا «كەڭمارت» ساۋدا ءۇيى ماڭىندا 1956 -جىلى تۋعان «كاماز» اۆتوكولىگىنىڭ جۇرگىزۋشىسى جول ۇستىندە جۇك كولىگىن توقتاتپاق بولعان 1969 -جىلى تۋعان جاياۋ جۇرگىنشىنى قاعىپ كەتتى. جازاتايىم وقيعا سالدارىنان زارداپ شەگۋشى وقيعا ورنىندا كوز جۇمدى. انىقتاما جۇرگىزىلىپ جاتىر»، - دەلىنگەن رەسمي حابارلامادا.

نۇر-سۇلتان قالالىق پوليتسيا ءبولىمى بارلىق كولىك جۇرگىزۋشىلەرىنە جولداردا، اسىرەسە بالالار وقۋ ورىندارىنىڭ جانىندا، قوعامدىق كولىك ايالدامالارىندا، جاياۋ جۇرگىنشىلەر وتكەلدەرىندە اباي بولۋدى، جىلدامدىقتى شەكتەپ، جول ەرەجەسىنىڭ باسقا دا تالاپتارىن ساقتاۋدى ەسكەرتەدى.

«اۋا-رايىنىڭ قولايسىزدىعىنا بايلانىستى نۇر-سۇلتان قالاسىنىڭ پوليتسيا دەپارتامەنتى كۇشەيتىلگەن رەجىمدە جۇمىس ىستەۋدە. دەپارتامەنتتىڭ جەكە قۇرامى حالىققا كومەك كورسەتۋ ءۇشىن تولىعىمەن جۇمىلدىرىلدى. بارلىق باعىت بويىنشا جول جابىلدى، كولىك قوزعالىسى ءۇشىن جەكەلەگەن جول ۋچاسكەلەرى جابىق»، - دەيدى پ د باسپا ءسوز قىزەتى.

دەپارتامەنتتىڭ حابارلاۋىنشا، وتكەن تاۋلىكتە ەلوردادا 74 جول-كولىك وقيعاسى بولعان.

اۆتور: ايجان سەرىكجان قىزى