ساپاربايەۆ 18 مىڭ وتباسىعا نەگە اتاۋلى الەۋمەتتىك كومەك بەرىلمەگەندىگىن ءتۇسىندىردى

نۇر-سۇلتان. قازاقپارات - ەلىمىزدە 18,5 مىڭ وتباسىعا اتاۋلى الەۋمەتتىك كوتەرۋدەن باس تارتىلدى.

بۇل تۋرالى بۇگىن حالىقپەن ەسەپتىك كەزدەسۋ وتكىزگەن ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ ايتتى، دەپ حابارلايدى قازاقپارات ءتىلشىسى.

«قانداي شارالار قابىلدانىپ جاتقانىن، مۇنان ارى نە ىستەيتىندىگىمىزدى ءسوز سويلەۋىم كەزىندە ايتتىم، تاعى دا قايتالاپ ايتامىن. ەڭ باستىسى بيىلعى جىلعا 130 ميلليارد تەڭگە قاراستىرىلعان. ءبىرىنشى جارتىجىلدىقتىڭ قورىتىندىسى بويىنشا 67 ميلليارد تەڭگە جۇمسالدى. اتاۋلى الەۋمەتتىك كومەك ءبولۋدى سايلاۋمەن بايلانىستىرۋعا مۇلدەم بولمايدى. بىزدەگىلەر سولاي بولجام جاساعاندى جاقسى كورەدى. بىرنارسە بولا قالسا بارلىعى دا سايلاۋمەن بايلانىستىرا قويادى»، - دەدى مينيستر.

ونىڭ ايتۋىنشا، ارنايى كوميسسيا قۇرىلعان. ولار اتاۋلى الەۋمەتتىك كومەك الۋعا نيەتتى وتباسىلاردىڭ قۇجاتتارىن تىڭعىلىقتى تەكسەرەدى.

«اتالعان كوميسسيا جۇمىسىنىڭ ناتيجەسىندە قۇجاتتارىن دۇرىس تولتىرماعان نەمەسە كۇماندى تولتىرعان 18,5 مىڭ وتباسىعا الەۋمەت كومەك بەرۋدەن باس تارتىلدى»، - دەدى ول.

بۇگىنگى كۇنى ا ا ك 277 مىڭنان استام وتباسىعا نەمەسە 1,3 ميلليون استام ادامعا تولەندى. جىل باسىنان بەرى 67,7 ميلليارد تەڭگە سوماسىندا ا ا ك تولەندى، تولەمنىڭ ورتاشا مولشەرى 105 مىڭ تەڭگەنى قۇرادى.