12:41, 02 - ناۋرىز 2019 | GMT +6
ارالدىق شەبەرلەر 18 مىڭ ساقينادان ساۋىت جاساپ شىعاردى
ارال. قازاقپارات - 27 جاستاعى Ⅱ توپ كوز مۇگەدەگى شايح-يسلام ماعاۋيا ۇلى ءوزىنىڭ ۇستازى، بەلگىلى شەبەر قۇدايبەرگەن قۇلمانبەتوۆپەن بىرگە ساۋىت جاساپ شىعاردى، دەپ حابارلايدى قازاقپارات ءتىلشىسى.
سالماعى 7 كەلى تارتاتىن ساۋىت جيىرما كۇننىڭ ىشىندە توقىلعان. وعان مەلحيور سىمنان جاسالعان 18 مىڭ ساقينا كەتكەن. سونداي-اق، ولار باتىردىڭ قارۋ-جاراقتارىن دا تۇگەلدەي ازىرلەگەن. شايح- يسلامنىڭ سوزىنشە، قازىرگى تاڭدا بۇل ساۋىت قازالى اۋدانى، ايتەكە بي كەنتىندەگى مۇراجايدا تۇر.
جالپى، جاس شەبەر تەرىدەن، اعاشتان ءتۇرلى بۇيىمدار ىستەۋمەن شۇعىلدانادى. سونداي-اق، مۇيىزدەن ءتۇرلى كادەسىيلار جاسايدى ەكەن. ايتۋىنشا، ارال قالاسىنا كەلگەن تۋريستەر ۇلتتىق ناقىشتاعى بۇيىمدارعا قىزىعۋشىلىق تانىتاتىن كورىنەدى. شايح-يسلام زەرگەرلىكتى دە قاتار الىپ ءجۇر. ساقينالار مەن ات ابزەلدەرىن جاسايدى.