وزبەكستان اۋرۋحاناسىندا جارىلىس بولىپ، 18 بالا زارداپ شەكتى
بۇل تۋرالى اتالمىش ەلدىڭ توتەنشە جاعدايلار مينيسترلىگىنىڭ رەسمي سايتىندا حابارلاندى.
«26- اقپان كۇنى ساعات 10.30 شاماسىندا ءاندىجان قالالىق مەديتسينالىق بىرلەستىگىنىڭ جانىنداعى ورتالىق ەمحانانىڭ قازاندىق بولمەسىندە جىلىتۋ قازانى جارىلدى. الدىن الا مالىمەت بويىنشا، اپاتقا قازاندىق قۇرىلعىسىنىڭ اقاۋى سەبەپ بولعان»، - دەلىنگەن ت ج م حابارلاماسىندا.
وقيعا سالدارىنان قازاندىق بولمەسىنە جاقىن ورنالاسقان فليۋوروگرافيا كابينەتىندە جىل سايىنعى تەكسەرىستەن ءوتىپ جاتقان مەكتەپ وقۋشىلارى زارداپ شەكتى. توعىزىنشى سىنىپتا وقيتىن 18 وقۋشى مەن ولارعا ىلەسىپ كەلگەن 4 مۇعالىم جەڭىل جاراقاتتار العان.
«قازىر ولاردىڭ جاعدايى قاناعاتتانارلىق. ەكى وقۋشىعا شۇعىل كومەك قاجەت بولدى، ولاردىڭ دا جاعدايى قاناعاتتانارلىق. ءاندىجان قالاسى حوكيمياتىنىڭ جانە توتەنشە جاعدايلار، ىشكى ىستەر، دەنساۋلىق ساقتاۋ، حالىقتىق ءبىلىم بەرۋ جونىندەگى وبلىستىق باسقارمالاردىڭ باسشىلارى، سونداي-اق «ۋزترانسگاز» ا ق ماماندارى ەنگەن كوميسسيا قۇرىلدى. ولار وقيعانىڭ سەبەبىن انىقتاپ، زارداپ شەككەندەرگە كومەك كورسەتۋ ماسەلەلەرىن قارايتىن بولادى»، - دەلىنگەن اقپاراتتا.