بۇگىن استانادا «نۇر وتان» پارتياسىنىڭ 18- سەزى وتەدى

None
None
استانا. قازاقپارات - بۇگىن استانا ۋاقىتىمەن 11:00-دە «نۇر وتان» پارتياسىنىڭ كەزەكتى XVIII سەزى باستالادى، دەپ حابارلايدى قازاقپارات.

كەزەكتى سەزد «نۇر وتان» پارتياسىنىڭ 20 جىلدىعىنا وراي ۇيىمداستىرىلىپ وتىر.

وندا پارتيانىڭ 2030-جىلعا دەيىنگى جاڭا باعدارلاماسىن تالقىلاۋ، پارتيا جارعىسىنا وزگەرتۋلەر مەن تولىقتىرۋلار ەنگىزۋ، پارتيالىق ورگانداردىڭ ەسەبىن تىڭداۋ جانە پارتيا ساياسي كەڭەسىنىڭ قۇرامىن جاڭارتۋ جوسپارلانعان.

«اتالعان سەزدىڭ پارتيامىزدىڭ 20 جىلدىعى اياسىنداعى باستى ءىس-شارا بولارىنا جانە الداعى جىلدارداعى ماقسات-مىندەتتەردى انىقتاپ، ءبىزدىڭ ساياسي ۇيىمنىڭ ودان ءارى جاڭعىرۋىنا تىڭ سەرپىن بەرەتىنىنە سەنىمىمىز مول» دەپ جازدى پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ الەۋمەتتىك جەلىدە.

ايتا كەتەيىك، 1998-جىلدىڭ 21- قازانىندا قازاقستاندا «قازاقستان پرەزيدەنتتىگىنە كانديدات نۇرسۇلتان ءابىش ۇلى نازاربايەۆقا قولداۋ كورسەتۋ قوعامدىق شتابى» قوعامدىق قوزعالىسى جۇمىسىن باستادى. سايلاۋالدى ناۋقان كەزىندە شتاب بەلسەندى جۇمىس ىستەدى. سونداي-اق، ساياسي پارتيالارمەن جانە قوزعالىستارمەن ىنتىماقتاستىق ورناتتى. اتالعان جۇمىستار بارىسىندا بەلگىلى مەملەكەت جانە ساياسي قايراتكەرلەر - س. ا. تەرەشەنكو، گ. ي. دۋنايەۆ، ح. ش. تاقۋوۆ بەلسەندىلىگىمەن كوزگە ءتۇستى. ءدال وسى كەزەڭدە قوعامدىق قوزعالىستى ساياسي پارتياعا اينالدىرۋ يدەياسى تۋرالى پىكىرلەر ايتىلا باستادى.

وسىعان بايلانىستى 1999-جىلى 19- قاڭتاردا ارنايى وتىرىس ءوتىپ، وندا قوعامدىق شتابتى «وتان» رەسپۋبليكالىق ساياسي پارتياسى» رەتىندە قايتا قۇرۋ شەشىمى قابىلداندى. ال 1999-جىلدىڭ 12- اقپانىندا پارتيا قازاقستان رەسپۋبليكاسىنىڭ زاڭناماسىنا ساي ادىلەت مينيسترلىگىنە تىركەلدى.

«ءدال وسى داتا پارتيانىڭ جۇمىسى باستالعان كۇن رەتىندە تاۋەلسىز قازاقستاننىڭ جاڭا تاريحىنا جازىلدى. پارتيانىڭ مۇراعاتىندا نۇرسۇلتان ءابىش ۇلى نازاربايەۆتىڭ 1999-جىلدىڭ 22- اقپانىندا «وتان» رەسپۋبليكالىق ساياسي پارتياسىنىڭ مۇشەسى رەتىندە تىركەلگەن كارتاسى ساقتاۋلى تۇر»، - دەپ اتاپ وتىلگەن «نۇر وتان» پارتياسىنىڭ مالىمەتىندە.

1999-جىلدىڭ 1-ناۋرىزىندا جاڭا پارتيانىڭ 1- قۇرىلتاي سەزى ءوتىپ، وندا ق ر پرەزيدەنتى نۇرسۇلتان نازاربايەۆ پارتيانىڭ ءتوراعاسى بولىپ سايلاندى. ودان بولەك، ساياسي كەڭەس پەن ورتالىق تەكسەرۋ كوميسسياسىنىڭ قۇرامدارى بەكىتىلىپ، پارتيانىڭ جارعىسى قابىلداندى. سونداي-اق سەزد دەلەگاتتارى «وتان» رەسپۋبليكالىق ساياسي پارتياسى، قازاقستاننىڭ حالىقتىق بىرلىك پارتياسى، قازاقستان دەموكراتيالىق پارتياسى، قازاقستان ليبەرالدىق قوزعالىسى جانە «قازاقستان-2030 ءۇشىن» قوزعالىسىنىڭ بىرىگۋى تۋرالى تاريحي ماڭىزعا يە رەزوليۋتسيانى قابىلدادى.

ال 2006-جىلى 4- شىلدەدە استانا قالاسىندا «وتان» رەسپۋبليكالىق ساياسي پارتياسىنىڭ كەزەكتەن تىس IX سەزى ءوتتى. وندا «وتان» ر س پ- عا «اسار» پارتياسىنىڭ قوسىلۋى تۋرالى شەشىم قابىلداندى. وسى جىلدىڭ 22- جەلتوقسانىندا وتكەن پارتيانىڭ كەزەكتەن تىس X سەزىندە «وتاننىڭ» ازاماتتىق جانە اگرارلىق پارتيالارمەن بىرىككەنى جاريالاندى. بۇل سەزدە باسىم داۋىسپەن قازاقستاننىڭ جەتەكشى ساياسي كۇشىنىڭ اتاۋىن «نۇر وتان» حالىقتىق-دەموكراتيالىق پارتياسى دەپ وزگەرتۋ تۋرالى شەشىم قابىلدانعان ەدى.

2013-جىلى 18- قازاندا «نۇر وتان» حالىقتىق-دەموكراتيالىق پارتياسىنىڭ اتاۋى «نۇر وتان» پارتياسى بولىپ وزگەرتىلدى. ءدال وسى كۇنى «نۇرلى بولاشاق جولىندا» اتتى پارتيانىڭ جاڭا دوكتريناسى قابىلداندى.

سوڭعى جاڭالىقتار