دانيال احمەتوۆ 18 بالانىڭ اكەسىنە كومەكتەسۋگە ۋادە بەردى

وسكەمەن. قازاقپارات - شىعىس قازاقستان وبلىسىنىڭ اكىمى دانيال احمەتوۆتىڭ جەكە قابىلداۋىندا بولعان كوپبالالى اكە ءوڭىر باسشىسىنا ءۇي سالۋعا جەر تەلىمىن جانە شاعىن اۆتوبۋس الۋعا كومەكتەسۋىن سۇرادى، دەپ حابارلايدى قازاقپارات ءتىلشىسى وڭىرلىك اقپارات ورتالىعىنا سىلتەمە جاساپ.

سەمەيلىك ۆيكتور كاندىبا 51 جاستا، زاڭ جۇزىندە «كوپبالالى اكە» اتاعىنا يە. وتباسىندا 18 بالا بار، ونىڭ ون ءۇشى - ۇل، بەسەۋى - قىز بالا. بالالاردىڭ ەڭ كەنجەسى 3 جاستا، ال ۇلكەنى 26 دا. ۆيكتور تۇرمىستىق تەحنيكانى جوندەۋ شەبەرى بولىپ جۇمىس جاسايدى، ال جارى ولگا - ءۇي شارۋاسىمەن، بالا باعۋمەن اينالىسادى. ۇلدارىنىڭ ۇلكەندەرىنىڭ ءبىرى ومارتاشى بولسا، تاعى بىرەۋى - قۇرىلىسشى.

مۇنداي ۇلكەن جانۇيا ءبىر جاققا بارۋى ءۇشىن شاعىن اۆتوبۋس كەرەك، ال كوپ بالا قىسىلىپ-قىمتىرىلماۋى ءۇشىن جايلى بولمەلەرى بولۋى قاجەت.

ءوڭىر باسشىسى د. احمەتوۆ كوپ بالالى وتاعاسى ۆيكتور كاندىبانى ەلىمىزدىڭ ماقتانىشى دەپ اتادى.

«ءبىز سىزگە جاردەمدەسەمىز. ءبىر اي كولەمىندە شاعىن اۆتوبۋسقا قاتىستى ماسەلەنى شەشەمىز. «پارىز» قايىرىمدىلىق قورى ارقىلى ءسىز ءۇشىن سەمەيدەن شاعىن اۆتوبۋس الدىرامىز. قۇرىلىسقا ارنالعان جەر تەلىمىن كوزىڭىزشە ءبولىپ بەرەمىن. بۇل ماسەلە جىلدام شەشىمىن تابۋ ءۇشىن بارىمىزدى سالامىز»، - دەدى د. احمەتوۆ.

كەزدەسۋ سوڭىندا وبلىس اكىمى سەمەي قالاسىنىڭ اكىمى ەرماك سالىموۆكە ءبىر اپتا ىشىندە جەر قاتىناسى باسقارماسىنىڭ باسشىسى ۆيكتوريا باركۋسوۆامەن بىرلەسىپ اتالمىش ماسەلەنى وڭتايلاندىرۋ ءۇشىن ۇسىنىستار ەنگىزۋدى تاپسىردى.