وڭتۇستىك قازاقستاندا قازاق تىلىنە اۋدارىلعان الەمگە ايگىلى 18 وقۋلىق تانىستىرىلدى
«رۋحاني جاڭعىرۋ» وبلىستىق جوبالىق كەڭسەسىنىڭ ۇيىمداستىرۋىمەن وتكەن شارادا جەرگىلىكتى عالىمدار كىتاپتاردىڭ ماڭىزىنا توقتالدى، دەپ حابارلايدى قازاقپارات ءتىلشىسى.
باس قوسۋ بارىسىندا عالىم، وقىتۋشىلار اۋدارىلعان وقۋلىقتارعا قاتىستى ءوز پىكىرلەرىن ءبىلدىرىپ، اتالمىش ەڭبەكتەردى ءدارىس بەرۋدە قولدانۋعا قاتىستى پىكىرلەرىن ءبىلدىردى. «100 جاڭا وقۋلىق» جوباسىنا جاستاردىڭ نازارىن اۋدارتىپ، وي-ءورىسىن كەڭەيتۋ ماسەلەسى ءسوز بولدى. ۇستازدار وسى تۋىندىلار ارقىلى اقپارات الماسۋ تاسىلدەرىن ۇيرەتۋ، مەملەكەتتىك تىلگە اۋدارىلعان كىتاپتار مەن وقۋ قۇرالدارىن حالىق اراسىندا ناسيحاتتاۋ جايىن تالقىلادى.
«وسى جوبانى ىسكە اسىرۋ ارقىلى الەۋمەتتىك جانە گۋمانيتارلىق بىلىمگە نازار اۋدارۋ - جاھاندىق اۋقىمداعى ءبىلىم سالاسىندا باسەكەگە قابىلەتتى ماماندار دايارلاۋعا ارنالعان پلاتفورمانى قامتاماسىز ەتۋگە جول اشىلدى. وعان دالەل بۇگىندە قولىمىزعا ءتيىپ وتىرعان 18 كىتاپ ەكەنىن ايتقىم كەلەدى. اۋدارمادا ءارتۇرلى مادەنيەتتەر، ءارتۇرلى تۇلعالار، ءارتۇرلى ويلاۋ قۇرىلىمى، داستۇرلەر كەزدەسەدى. بۇل ەڭبەكتەر وركەنيەتتەر اراسىنداعى مادەني سۇحباتتى ارتتىرا تۇسۋگە مول مۇمكىندىك بەرەدى دەگەن سەنىمدەمىن. سونىمەن قاتار، اۋدارىلعان وقۋلىقتاردىڭ ارقاسىندا ادامزات رۋحىنىڭ شارىقتاعان بيىكتەرىن ستۋدەنتتەر ءوز تىلىندە وقي الاتىن بولادى»، - دەدى فيلولوگيا عىلىمدارىنىڭ كانديداتى، دوتسەنت بايان ارىنعازيەۆا.
جيىنعا قاتىسقان عالىمداردىڭ سوزىنشە، بۇل كىتاپتاردىڭ بارلىعى دا قۇندى. ويتكەنى تاڭدالىپ الىنعان، كوبىسى 10 رەتتەن باسىلىپ شىققان جانە باسىلىمى 2014-جىلدان كەم ەمەس دەگەن تالاپتارعا ساي كەلەدى. سوندىقتان وسى جوباعا ەنگىزىلگەن وقۋلىقتىڭ ءارقايسىسىنىڭ ماڭىزى زور.
«زاماناۋي ۇلتتىڭ باستى شارتى - باسەكەگە قابىلەتتى، عىلىم مەن ءبىلىمدى قاتار مەڭگەرگەن جاستى تاربيەلەۋ. بۇل رەتتە مەكتەپ پەن جوعارى وقۋ ورنىنىڭ ماڭىزى زور. جاڭا وقۋلىقتار ءبىلىمنىڭ ناعىز ەنتسيكلوپەدياسى بولماق. الەۋمەت تانۋ، فيلوسوفيا، ءتىل ءبىلىمى، پسيحولوگيا سالالارىمەن قاتار، اتقارىلاتىن جۇمىستىڭ ۇلكەن ءبىر بولىگى ەكونوميكا عىلىمىن دا قامتىپ وتىر. كىتاپتار لاتىن قارپىندە باسىپ شىعارىلعاننان كەيىن، ولاردى شەتەلدە تۇراتىن جاستارىمىز دا وقي الاتىن بولادى. سونداي-اق، «رۋحاني جاڭعىرۋ» اياسىندا شەتەلدىك عالىمداردىڭ ەڭبەكتەرىمەن قاتار، ءوزىمىزدىڭ وتاندىق عالىم-پەداگوگتاردىڭ دا وزىق وقۋلىقتارىن كادەگە جاراتا ءبىلۋىمىز قاجەت»، - دەيدى م. اۋەزوۆ اتىنداعى و ق م ۋ- ءنىڭ ف. ع. ك، دوتسەنت اقجول قالشابەك.
باس قوسۋدى ۇيىمداستىرۋشىلار كىتاپتارمەن تولىعىراق وقىپ-تانىسۋعا 10 كۇن بويى كورمە ۇيىمداستىرىلاتىنىن ايتادى.
ايتا كەتەيىك، «قازاق تىلىندەگى 100 جاڭا وقۋلىق» جوباسى اياسىندا اۋدارىلعان العاشقى كىتاپتار ق ر پرەزيدەنتى نۇرسۇلتان نازاربايەۆقا تانىستىرىلعان بولاتىن. اتى ايگىلى تۋىندىلار الەمنىڭ 42 ەلىندە 34 تىلدە جاريالانعان. جالپى تارالىمى 47 ميلليون دانانى قۇرايتىن فيلوسوفيا، الەۋمەتتانۋ، پسيحولوگيا، ەكونوميكا جانە باسقا دا پاندەر بويىنشا الەمدىك ويلاردىڭ التىن قورىنا ەنگەن ەڭبەكتەر. قازاقستاندا اۋدارىلعان وقۋلىقتار 10 مىڭ دانا تارالىممەن جاريالانادى، ال مامىر ايىندا ولار ۋنيۆەرسيتەتتەر مەن قالالاردىڭ كىتاپحانالارىنا جىبەرىلەدى. كەلەسى وقۋ جىلىندا جاڭا وقۋلىقتار ناقتى ءبىلىم بەرۋ ۇدەرىسىندە قولدانىلادى دەپ كۇتىلۋدە.